ប្រទេសចិនបានចាប់ផ្តើមផ្តល់ការធ្វើដំណើរដោយមិនចាំបាច់មានទិដ្ឋាការសម្រាប់ប្រជាជនកម្ពុជាទៅកាន់មណ្ឌលស្វយ័ត Xishuangbanna។
ចំណាត់ការនេះ គឺសំដៅបង្កើនភ្ញៀវទេសចរពីតំបន់អាស៊ីអាគ្នេយ៍ ក៏ដូចជាជួយសម្រួលដល់អ្នកដំណើរមកពីប្រទេសសមាជិកអាស៊ានទាំងអស់ លើកលែងតែទីម័រខាងកើត។
គំនិតផ្តួចផ្តើមនេះត្រូវបានដាក់ចេញកាលពីថ្ងៃចន្ទដោយរដ្ឋបាលអន្តោប្រវេសន៍ជាតិរបស់ប្រទេសចិនក្នុងគោលបំណងជំរុញទេសចរណ៍នៅក្នុងតំបន់។
នៅក្រោមគោលនយោបាយនេះ ក្រុមអ្នកទេសចរយ៉ាងហោចណាស់មានគ្នាពីរនាក់ដែលកាន់លិខិតឆ្លងដែនធម្មតាពីប្រទេសដែលបានរៀបរាប់ខាងលើអាចស្នាក់នៅ Xishuangbannaរហូតដល់៦ថ្ងៃដោយមិនចាំបាច់មានទិដ្ឋាការ។
ពេលនេះ ជនជាតិខ្មែរអាចចូល និងចេញពី Xishuangbanna តាមរយៈកំពង់ផែដែលបានកំណត់ រួមទាំងអាកាសយានដ្ឋានអន្តរជាតិ XishuangbannaGasa កំពង់ផែ Mohan Railway និងកំពង់ផែ Mohan Highway Port។
ប៉ុន្តែ ការធ្វើដំណើររបស់ពួកគេនឹងមិនត្រូវបានអនុញ្ញាតអោយទៅតំបន់រដ្ឋបាល Xishuangbanna ទេ។
បន្ថែមពីលើការទាក់ទាញភ្ញៀវទេសចរ ប្រទេសចិនកំពុងពង្រឹងប្រព័ន្ធអន្តោប្រវេសន៍របស់ខ្លួន ដើម្បីលើកទឹកចិត្តការធ្វើដំណើរអន្តរជាតិ និងឱកាសអាជីវកម្ម ដែលបង្ហាញពីចេតនារបស់ខ្លួនក្នុងការបើកព្រំដែនបន្ថែមទៀតដល់ជនបរទេស នេះបើយោងតាមគេហទំព័រទេសចរណ៍ Travel and Tour World។
Xishuangbanna គឺជាមណ្ឌលស្វយ័តមួយនៅក្នុងខេត្ត Yunnan ភាគនិរតីនៃប្រទេសចិន ដែលមានព្រំប្រទល់ជាប់ប្រទេសមីយ៉ាន់ម៉ា និងឡាវ។ ទីនេះត្រូវបានគេស្គាល់តាមរយៈវប្បធម៌ ជនជាតិ Dai ប្រាសាទ និងព្រៃត្រូពិច។
ជាកន្លែងទេសចរណ៍ដែលកំពុងលេចធ្លោនៅក្នុងប្រទេសចិន ក្រុង Jinghong ស្ថិតក្នុងមណ្ឌលស្វយ័តរបស់ Xishuangbannaមានផ្លូវដែលមានដើមត្នោតដុះត្រសង និង “សួនផ្កាត្រូពិច និងរុក្ខជាតិ” ជាមួយនឹងដើមឈើហូបផ្លែ និងផ្កាជាច្រើន។
ប្រាសាទពុទ្ធសាសនាMengleគឺជាកន្លែងសាសនា Dai ដ៏ធំដែលបានបញ្ចប់ការសាងសង់ក្នុងឆ្នាំ ២០០៧។
បុគ្គលិកម្នាក់មកពីទីភ្នាក់ងារទេសចរណ៍ Kanghui នៅ Xishuangbanna ដែលត្រូវបានដកស្រង់ដោយសម្តីដោយ Global Times បានអោយដឹងថា ឧស្សាហកម្មបដិសណ្ឋារកិច្ចនៅក្នុងខេត្តកំពុងត្រូវបានរៀបចំដើម្បីស្វាគមន៍ភ្ញៀវទេសចរអាស៊ាន។
ប្រភពដដែលបានអោយដឹងថា ចំនួនអ្នកទេសចរបានកើនឡើងយ៉ាងឆាប់រហ័សចាប់តាំងពីដើមឆ្នាំ២០២៥ជាពិសេស ភ្ញៀវទេសចរមកពីតំបន់អាស៊ីអាគ្នេយ៍។ លោកបានកត់សម្គាល់ថា “ផលជះនៃគោលនយោបាយគ្មានទិដ្ឋាការអាចនឹងមិនបង្ហាញឱ្យឃើញភ្លាមៗនោះទេ ប៉ុន្តែត្រូវបានគេរំពឹងថានឹងមានភាពវិជ្ជមានទៅថ្ងៃខាងមុខ”។
មន្ត្រីម្នាក់មកពីរដ្ឋបាលអន្តោរប្រវេសន៍ជាតិបានលើកឡើងថា “គោលនយោបាយនេះគឺជាវិធានការដ៏សំខាន់មួយដើម្បីពង្រីកការបើកចំហររបស់ប្រទេសចិននិងជំរុញតួនាទីរបស់ខេត្ត Yunnan ជាមជ្ឈមណ្ឌលប្រចាំតំបន់សម្រាប់អាស៊ីខាងត្បូង និងអាស៊ីអាគ្នេយ៍”។
“គំនិតផ្តួចផ្តើមនេះនឹងជំរុញទេសចរណ៍នៅភាគនិរតីនៃប្រទេសចិន សម្រួលដល់ការផ្លាស់ប្តូររវាងប្រជាជនមកពីប្រទេសចិន និងប្រទេសដទៃទៀត ក៏ដូចជាពង្រឹងកិច្ចសហប្រតិបត្តិការយុទ្ធសាស្ត្រចិន-អាស៊ាន” ។
ចំនួនទេសចរណ៍ក្រៅប្រទេសរបស់កម្ពុជាបានកើនឡើង ១.៨ ភាគរយក្នុងរយៈពេល១១ខែដំបូងនៃឆ្នាំ២០២៤ ធៀបនឹងរយៈពេលដូចគ្នាកាលពីឆ្នាំមុន។
ទោះជាយ៉ាងណាក៏ដោយ នេះបានបង្ហាញពីការធ្លាក់ចុះ ១០.៣ភាគរយ បើប្រៀបធៀបទៅនឹងតួលេខឆ្នាំ ២០១៩ដោយបង្ហាញថា ជំងឺរាតត្បាតបានជះឥទ្ធិពលយ៉ាងធ្ងន់ធ្ងរដល់វិស័យទេសចរណ៍ក្រៅប្រទេស។
