ក្រុមការងារគម្រោងតុក្កតាយក្ស ដែលជាកុមារមកពីអង្គការផ្សេងៗ នៃគម្រោងតុក្កតាយក្ស កំពុងមមាញឹកក្នុងការងាររៀបចំដំឡើងរូបតុក្កតាយក្ស ត្រៀមហែក្បួនដ៏ធំប្រចាំឆ្នាំ ក្នុងក្រុងសៀមរាប។
លោក អ៊ុន សាវ៉ាន់ តំណាងក្រុមការងារតុក្កតាយក្សបានឱ្យដឹងថា ការដង្ហែក្បួនតុក្កតាយក្សនៅឆ្នាំ២០២៥ មានចំនួន៩តុក្កតា ដែលគ្រោងធ្វើឡើងនៅថ្ងៃទី២២ ខែកុម្ភៈ ឆ្នាំ២០២៥ ដោយមានអ្នកចូលរួមដង្ហែជាង ១០០០នាក់ ដើម្បីបង្ហាញដល់អ្នកទេសចរជាតិ អន្ដរជាតិឱ្យបានឃើញពីស្នាដៃរបស់កុមារកម្ពុជា ហើយក៏ជាការបង្កើតនូវព្រឹត្តិការណ៍ថ្មីៗ ជាការទាក់ទាញដល់អ្នកទេសចរ។
ចំពោះរូបភាពតុក្កតាយក្សដែលគ្រោងដង្ហែនៅឆ្នាំនេះ បានរៀបចំជាតុក្កតាតួអង្គទេវកថារបស់ខ្មែរចំនួន ៩តួអង្គ ដែលមានរឿងរ៉ាវនៅតាមប្រាសាទបុរាណ ដូចជារូបព្រះគិណេស ចម្លាក់សត្វតោនៅប្រាសាទសំបូរព្រៃគុក រូបទេពសុវណ្ណមច្ឆា សត្វកែណរី និងរូបគ្រុឌជាដើម ដែលប្រវែង៥ម៉ែត្រឡើងទៅ។
លោក សាវ៉ាន់ បន្ថែមថា ព្រឹត្តិការណ៍មួយឆ្នាំមានម្ដងនេះ នឹងជួយលើកស្ទួយសេដ្ឋកិច្ចប្រជាពលរដ្ឋ និងបង្កើនការទាក់ទាញដល់អ្នកទេសចរ ហើយក៏សូមអំពាវនាវដល់ភ្ញៀវទេសចរជាតិ និងអន្ដរជាតិ រួមនឹងសាធារណជនទូទៅ ចូលរួមជួយគាំទ្រ ដើម្បីលើកទឹកចិត្ដដល់កុមារដែលបានចូលរួមក្នុងការងារនេះ។ តាមអ្នករៀបចំព្រឹត្តិការណ៍នេះ ក្បួនដង្ហែតុក្កតាយក្ស នឹងផ្ដើមចេញដំណើរនៅវេលាម៉ោង៦ល្ងាច ចាប់ពីរង្វង់មូលវត្តដំណាក់ តាមបណ្ដោយដងស្ទឹងសៀមរាប ឆ្ពោះទៅកាន់សួនច្បារព្រះរាជដំណាក់។ ក្រោយដង្ហែរួច តុក្កតាយក្សនឹងរក្សាទុកនៅទីនោះខ្លះ ក្រៅពីនេះនៅមន្ទីរពេទ្យកុមារទាំងពីរ និងតាមសណ្ឋាគារមួយចំនួនទៀត៕
