ក្រុមហ៊ុន និងអ្នកវិនិយោគបរទេសជាច្រើនបានបង្ហាញចំណាប់អារម្មណ៍ក្នុងការសិក្សា និងវិនិយោគលើការផលិតជីវម៉ាស និងជីវថាមពល ដោយប្រើប្រាស់សំបកគ្រាប់និងមែកស្វាយចន្ទី នៅកម្ពុជា។
ជីវម៉ាសដើរតួនាទីយ៉ាងសំខាន់ក្នុងការផ្លាស់ប្តូរទៅកាន់ប្រព័ន្ធថាមពលស្អាត និងមានចីរភាព។
សន្និសីទ ជីវម៉ាស និងជីវថាមពលអាស៊ីលើកទី៨ (The 8th Biomass & Bioenergy Asia Conference)ដែលប្រព្រឹត្តទៅនៅទីក្រុងហូជីមិញ ប្រទេសវៀតណាម ពីថ្ងៃទី២៧-២៨ ខែវិច្ឆិកា បានប្រមូលផ្តុំមេដឹកនាំឧស្សាហកម្ម អ្នកជំនាញ និងអ្នកវិនិយោគដើម្បីពិភាក្សាអំពីវឌ្ឍនភាពថ្មីៗ និងឱកាស ក្នុងវិស័យជីវម៉ាស និងជីវថាមពលនៅទូទាំងតំបន់។
អនុប្រធានសមាគមស្វាយចន្ទីកម្ពុជា (CAC) លោក ស៊ុយ កុកធាន ដែលបានចូលរួមក្នុងសន្និសីទកាលពីសប្តាហ៍មុន បានប្រាប់កាសែតខ្មែរថាមស៍កាលពីម្សិលមិញថា សន្និសីទនេះផ្តោតលើសក្តានុពលនៃការផលិតជីវម៉ាស់ពីអនុផលគ្រាប់ស្វាយចន្ទីដែលបោះចោល ជាពិសេសសំបក និង មែកស្វាយចន្ទីដែលកសិករកាត់ និងបោះចោល។
លោក កុកធាន មានប្រសាសន៍ថា វិនិយោគិនបរទេសមកពីជុំវិញពិភពលោក ជាពិសេសមកពីអឺរ៉ុបបានបង្ហាញចំណាប់អារម្មណ៍យ៉ាងខ្លាំងចំពោះជីវម៉ាស់ដែលបានមកពីសំបកគ្រាប់និងមែកស្វាយចន្ទី។
លោកបានមានប្រសាសន៍ថា “ជីវម៉ាស់សំបកគ្រាប់ស្វាយចន្ទីតំណាងឱ្យឱកាសដ៏មានតម្លៃសម្រាប់ផលិតកម្មថាមពលស្អាត និងការកាត់បន្ថយកាកសំណល់ ជាពិសេសនៅក្នុងប្រទេសដែលមានផលិតកម្មគ្រាប់ស្វាយចន្ទីច្រើនដូចជាកម្ពុជា”។
លោកបានបន្ថែមថា “បទបង្ហាញរបស់ខ្ញុំមានគោលបំណងមិនត្រឹមតែទាក់ទាញអ្នកវិនិយោគវៀតណាមប៉ុណ្ណោះទេ ថែមទាំងទាក់ទាញអ្នកវិនិយោគមកពីជុំវិញពិភពលោក ជាពិសេសអ្នកវិនិយោគមកពីអឺរ៉ុបដែលបានបង្ហាញចំណាប់អារម្មណ៍ក្នុងការស្វែងរកឱកាសជីវម៉ាសនៅកម្ពុជា។ ខ្ញុំបានធ្វើបទបង្ហាញដល់ក្រុមហ៊ុនធំមួយមកពីអឺរ៉ុបដែលបានបង្ហាញចំណាប់អារម្មណ៍ក្នុងការវិនិយោគក្នុងទំហំទឹកប្រាក់ ៥០០ លានដុល្លារក្នុងគម្រោងជីវម៉ាសនៅអាស៊ីអាគ្នេយ៍»។
បើតាមលោក កុកធាន ក្រុមហ៊ុនធំមួយនឹងបំពេញទស្សនកិច្ចផ្លូវការនៅកម្ពុជា នៅខែមករា ឆ្នាំ២០២៥ ដើម្បីសិក្សា ហើយលោកនឹងរៀបចំកិច្ចប្រជុំជាមួយតំណាងរដ្ឋាភិបាល ជាពិសេសពីក្រុមប្រឹក្សាអភិវឌ្ឍន៍កម្ពុជា ដើម្បីស្វែងរកការណែនាំ និងអនុសាសន៍ទាក់ទងនឹងគម្រោងវិនិយោគ។
“ប្រសិនបើយើងអាចទាក់ទាញអ្នកវិនិយោគបាន កសិកររបស់យើងនឹងលែងជួបការលំបាកក្នុងការបោះចោលមែកស្វាយចន្ទីដែលពួកគេបានកាប់។ ជំនួសមកវិញ ពួកគេអាចលក់មែកស្វាយចន្ទីសម្រាប់ផលិតកម្មជីវម៉ាស ដោយផ្តល់ឱ្យពួកគេនូវប្រាក់ចំណូលបន្ថែម ដើម្បីគាំទ្រដល់សកម្មភាពកសិកម្មរបស់ពួកគេ»។
សំបកគ្រាប់ស្វាយចន្ទី គឺជាសំបកគ្រាប់ដែលគេបកចេញសល់ពីផលិតផលដើម គឺគ្រាប់ស្វាយចន្ទី។ លក្ខណៈរូបវន្ត និងគីមីនៃសំបកគ្រាប់ស្វាយចន្ទី ធ្វើឱ្យពួកវាក្លាយជាការជំនួសដ៏ល្អសម្រាប់ឥន្ធនៈហ្វូស៊ីល។ ជីវម៉ាស សំដៅលើសារធាតុសរីរាង្គដែលបានមកពីរុក្ខជាតិ សត្វ និងអតិសុខុមប្រាណដែលអាចត្រូវបានប្រើជាប្រភពថាមពលកកើតឡើងវិញ។
យោងតាមក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា គ្រាប់ស្វាយចន្ទីអាចលក់បានក្នុងតម្លៃប្រហែល ១១៥ ទៅ ១៣០ ដុល្លារក្នុងមួយតោន ហើយអាចកែច្នៃធ្វើជាប្រេង ឬប្រើក្នុងឡដុតដែក។
