ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងសហព័ន្ធដំឡូងមីកម្ពុជាកាលពីថ្ងៃអង្គារបានពិភាក្សាគ្នាអំពីយុទ្ធសាស្ត្រដើម្បីបង្កើនការកែច្នៃ និងផលិតដំឡូងមីក្នុងស្រុក។
កម្ពុជាជាប្រទេសនាំចេញដំឡូងមីធំជាងគេទី៤ របស់អាស៊ី និងជាប្រទេសនាំចេញដំឡូងមីធំជាងគេទី១០ លើពិភពលោក ជាមួយនឹងផ្ទៃដីដាំដុះចំនួន ៦០,០០០ ទៅ ៨០,០០០ ហិកតា។
ក្នុងជំនួបជាមួយគណៈប្រតិភូសហព័ន្ធដំឡូងមីកម្ពុជា (CFC) ដឹកនាំដោយលោក ច្រាយ សុន ប្រធាន CFC លោក ហែម វណ្ឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានគូសបញ្ជាក់ថាការផ្លាស់ប្តូរពីការនាំចេញមើមដំឡូងមីស្រស់ ទៅជាការកែច្នៃក្នុងស្រុក គឺជាគន្លឹះក្នុងការបង្កើតតម្លៃបន្ថែមលើកកម្ពស់ជីវភាពរបស់ប្រជាកសិករនិងធ្វើពិពិធកម្មឧស្សាហកម្មរបស់កម្ពុជា។
សេចក្តីប្រកាសព័ត៌មានរបស់ក្រសួងបានអោយដឹងទៀតថា កិច្ចប្រជុំបានដោះស្រាយបញ្ហាប្រឈមនៅក្នុងឧស្សាហកម្ម និងស្វែងរកឱកាសដើម្បីបង្កើនសក្តានុពលសេដ្ឋកិច្ចរបស់ដំឡូងមីតាមរយៈការកែច្នៃក្នុងស្រុក និងផលិតកម្មបន្ថែមតម្លៃ។
លោក ហែម វណ្ណដីបានមានប្រសាសន៍ថា “CFC ដើរតួនាទីយ៉ាងសំខាន់ក្នុងការរៀបចំអ្នកដាំដំឡូងមី រកពូជដែលសម្បូរម្សៅ និងធានាការអនុវត្តដោយយុត្តិធម៌ក្នុងវិស័យនេះ។
លោកបានបញ្ជាក់ថា ក្រសួងគាំទ្រចំពោះសំណើរបស់ CFC ក្នុងការអនុម័តវិធីសាស្ត្រផលិតកម្មស្អាត និងបង្កើតក្រុមខ្សែសង្វាក់តម្លៃដំឡូងមី។
លោកបានប្រគល់ភារកិច្ចឱ្យវិទ្យាស្ថានស្តង់ដារកម្ពុជាធ្វើបច្ចុប្បន្នភាពស្ដង់ដារទាក់ទងនឹងដំឡូងមីកម្ពុជា ដើម្បីឲ្យស្របតាមតម្រូវការទីផ្សារ។
លោកក៏បានលើកទឹកចិត្តឱ្យ CFC សហការជាមួយសហគ្រិនខ្មែរសម្រាប់ការធ្វើផែនការអាជីវកម្ម ការទទួលបានទីផ្សារ និងការចូលរួមក្នុងពិព័រណ៍អន្តរជាតិ។ ភាពជាដៃគូជាមួយស្ថាប័នហិរញ្ញវត្ថុដូចជា ធនាគារសហគ្រាសធុនតូច និងមធ្យមនិងធនាគារអភិវឌ្ឍន៍ជនបទ និងកសិកម្មនឹងជួយCFC ឱ្យទទួលបានមូលនិធិសម្រាប់សហគ្រាសដំឡូងមី។
ប្រធាន CFC បានសង្កត់ធ្ងន់លើសក្តានុពលដ៏ធំធេងរបស់អនុវិស័យនេះ។ លោកបានមានប្រសាសន៍ថា “បច្ចុប្បន្ននេះ កម្ពុជានាំចេញដំឡូងមីស្រស់ ៩៥ ភាគរយ និងកែច្នៃក្នុងស្រុកត្រឹមតែ ៥ ភាគរយប៉ុណ្ណោះ ដែលរួមចំណែកប្រមាណ ៧២៨ លានដុល្លារដល់សេដ្ឋកិច្ចជាតិ”។
«ដំឡូងមីអាចត្រូវបានបំប្លែងទៅជាផលិតផលច្រើនប្រភេទ រួមមានម្សៅ នំប៉័ង នំស្រួយ ភេសជ្ជៈ និងទំនិញឧស្សាហកម្មដូចជាក្រដាស»។
លើសពីនេះ លោក ហែម វណ្ណឌី បានស្នើឱ្យសហការស្រាវជ្រាវជាមួយវិទ្យាស្ថានជាតិវិទ្យាសាស្ត្រ បច្ចេកវិទ្យា និងនវានុវត្តន៍ដើម្បីទទួលបានបច្ចេកវិទ្យាកែច្នៃឡើងវិញកម្រិតខ្ពស់។ លោកក៏បានជំរុញឱ្យ CFC កៀរគរគ្រួសារដាំដំឡូងមីចំនួន ៩០,០០០ របស់កម្ពុជា ឱ្យចូលរួមក្នុងវេទិកាឌីជីថលដែលទើបនឹងដាក់ឱ្យដំណើរការថ្មីសម្រាប់អ្នកសេដ្ឋកិច្ចក្រៅប្រព័ន្ធ ក្នុងគោលបំណងលើកកម្ពស់ភាពធន់ និបរិយាបន្នសេដ្ឋកិច្ច។
នៅថ្ងៃចន្ទនេះ រាជរដ្ឋាភិបាលបានដាក់ឱ្យដំណើរការជាផ្លូវការនូវ “វេទិកាចុះបញ្ជីឌីជីថលសម្រាប់អ្នកសេដ្ឋកិច្ចក្រៅប្រព័ន្ធ” ដែលបានធ្វើឡើងក្រោមអធិបតីភាពលោកនាយករដ្ឋមន្ត្រី ហ៊ុន ម៉ាណែត។
នៅក្នុងឱកាសនោះលោកនាយករដ្ឋមន្រ្តី ហ៊ុន ម៉ាណែត បានសង្កត់ធ្ងន់លើសារសំខាន់នៃវេទិកានេះក្នុងការទទួលស្គាល់ និងការគាំទ្រសម្រាប់សេដ្ឋកិច្ចក្រៅប្រព័ន្ធ។
គួររំលឹកផងដែរថា កាលពីចុងខែមុន គណៈប្រតិភូមកពីក្រុមប្រឹក្សាភិបាល CFC បានចូលជួបសម្តែងការគួរសមជាមួយលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម និងបានរាយការណ៍អំពីវឌ្ឍនភាពរបស់ CFC ។
ក្នុងជំនួបនោះ ក្រុមប្រឹក្សាភិបាល CFC ក៏បានស្នើសុំការណែនាំ អនុសាសន៍ និងការគាំទ្រ ដើម្បីជួយសហព័ន្ធក្លាយជាដៃគូយុទ្ធសាស្ត្រក្នុងការលើកកម្ពស់ផលិតភាពដំឡូងមី ដែលជាដំណាំសំខាន់ និងធ្វើពិពិធកម្មទីផ្សារដើម្បីបង្កើនការនាំចេញរបស់កម្ពុជា។
