កាលពីថ្ងៃសុក្រសប្ដាហ៍មុន រាជរដ្ឋាភិបាលបានចេញសេចក្ដីសម្រេចស្តីពីការតែងតាំងសមាសភាពគណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ ដែលមានលោក ថោង ខុន រដ្ឋមន្រ្តីក្រសួងទេសចរណ៍ ជាប្រធាន លោក សាយ សំអាល់ រដ្ឋមន្រ្តីក្រសួងបរិស្ថាន ជាអនុប្រធានអចិន្រ្តៃយ៍ លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ជាអនុប្រធាន។
រដ្ឋាភិបាលក៏បានតែងតាំងមន្ត្រីរដ្ឋាភិបាលជាន់ខ្ពស់មួយចំនួនជាសមាជិក NCDCBE ផងដែរ។
នៅក្នុងសេចក្តីថ្លែងការណ៍មួយដែលចេញដោយក្រសួងទេសចរណ៍កាលពីថ្ងៃសៅរ៍បាននិយាយថាការសម្រេចរបស់រដ្ឋាភិបាលក្នុងការបង្កើត NCDCBE គឺផ្អែកលើបទពិសោធន៍របស់ក្រុមការងារអន្តរក្រសួងដើម្បីអភិវឌ្ឍសហគមន៍ទេសចរណ៍ និងអេកូទេសចរណ៍ ។
ការបង្កើតគណៈកម្មាធិការនេះ គឺធ្វើឡើងបន្ទាប់ពីរាជរដ្ឋាភិបាលបានបង្កើតក្នុងឆ្នាំ២០១៧ នូវក្រុមការងារអន្តរក្រសួងគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ ដែលមានលោករដ្ឋមន្រ្តី ថោង ខុន ជាប្រធាន។
ក្រុមការងារអន្តរក្រសួងក្រោមការដឹកនាំរបស់លោក ថោង ខុន បានសម្រេចការងារជាច្រើន ដូចជាការអនុម័តដាក់ឲ្យប្រើប្រាស់គោលនយោបាយជាតិអេកូទេសចរណ៍ (២០១៩-២០៣០) ការរៀបចំវេទិកាជាតិអេកូទេសចរណ៍ចំនួន២លើក ការកំណត់យកថ្ងៃទី១៩ ខែវិច្ឆិកាប្រចាំឆ្នាំជា «ទិវាជាតិអេកូទេសចរណ៍» រួមជាមួយការដោះស្រាយបញ្ញាជាក់ស្តែងជាច្រើនទៀតរបស់សហគមន៍ទេសចរណ៍ និងអេកូទេសចរណ៍ទូទាំងប្រទេស។
ដើម្បីជំរុញវិស័យទេសចរណ៍ ក្រសួងបានចេញសេចក្តីណែនាំមួយនៅថ្ងៃសុក្រនេះដើម្បីបង្កើតក្រុមការងារអន្តរក្រសួងដែលនឹងសម្របសម្រួលការអនុវត្តគម្រោងទេសចរណ៍ផ្សេងៗ ដែលបង្កើតឡើងដោយដៃគូអភិវឌ្ឍន៍ផ្សេងៗគ្នា។
ក្រុមការងារអន្តរក្រសួងរបស់ក្រសួងក៏នឹងជួយដៃគូអភិវឌ្ឍន៍ក្នុងការអនុវត្ត និងវាយតម្លៃគម្រោងទេសចរណ៍របស់ពួកគេដើម្បីស្វែងរកដំណោះស្រាយល្អប្រសើរ។
ជាដំបូង ក្រុមការងារអន្តរក្រសួងត្រូវធ្វើការសហការជាមួយក្រសួង ស្ថាប័ន អង្គការជាតិ-អន្តរជាតិ ផ្នែកឯកជន និងភាគីពាក់ព័ន្ធទាំងអស់ ដើម្បីសម្របសម្រួលការងារអភិវឌ្ឍសហគមន៍ទេសចរណ៍ និងអេកូទេសចរណ៍កម្ពុជាឲ្យមានប្រសិទ្ធភាព និងអនុវត្តភារកិច្ចផ្សេងៗទៀតតាមការប្រគល់ជូនដោយរាជរដ្ឋាភិបាល។
ទីពីរត្រូវធ្វើការស្រាវជ្រាវ និងសិក្សា ដើម្បីផ្តល់ព័ត៌មានចាំបាច់ដល់ដៃគូអភិវឌ្ឍន៍ អង្គការជាតិ-អន្តជាតិ ដើម្បីឲ្យពួកគេបង្កើត និងអនុវត្តគម្រោងទេសចរណ៍ឲ្យបានគ្រប់គ្រាន់។
ក្រៅពីវិស័យឯកជន ក្រុមការងារនឹងផ្តល់អាទិភាពដល់គម្រោងអភិវឌ្ឍន៍ដែលផ្តួចផ្តើមដោយនាយកដ្ឋានក្រោមការត្រួតពិនិត្យរបស់ក្រសួង និងទាក់ទាញ ក៏ដូចជាលើកទឹកចិត្តដៃគូអភិវឌ្ឍន៍ក្នុងការវិនិយោគលើគម្រោងទាំងនោះ។
បន្ទាប់ពីអនុវត្តគម្រោងទេសចរណ៍ផ្សេងៗ ក្រុមការងារនឹងដឹកនាំរៀបចំវេទិកាជាតិអេកូទេសចរណ៍ប្រចាំឆ្នាំ និងព្រឹត្តិការណ៍នានាក្នុងការជំរុញការអភិវឌ្ឍសហគមន៍ទេសចរណ៍ និងអេកូទេសចរណ៍។
ពាក់ព័ន្ធនឹងគំនិតផ្តួចផ្តើមទាំងនេះ នៅកាលពីថ្ងៃច័ន្ទសប្តាហ៍មុនអនុស្សារណៈនៃការយោគយល់គ្នាត្រូវបានចុះហត្ថលេខរវាងក្រសួងទេសចរណ៍ និងក្រុមហ៊ុន Wonder Pass Technology ដើម្បីលើកកម្ពស់ការអភិវឌ្ឍន៍បច្ចេកវិទ្យាឌីជីថល ក្នុងវិស័យទេសចរណ៍។
ក្នុងពិធីចុះហត្ថលេខានេះលោក Frederic Proulx ស្ថាបនិកក្រុមហ៊ុន Wonderpass Technologyបានលើកឡើងថាក្រុមហ៊ុនរបស់លោកនឹងខិតខំប្រឹងប្រែងផ្តល់ដំណោះស្រាយឌីជីថល ដើម្បីជំរុញវិស័យទេសចរណ៍ក្នុងស្រុក និងអន្តរជាតិនៅក្នុងប្រទេស។
ជាមួយគ្នានេះលោក ថោង ខុន បាននិយាយថាដំណោះស្រាយឌីជីថលដូចជាប្រព័ន្ធឌីជីថល Wonderpass គឺស្របតាមគោលនយោបាយរបស់ក្រសួងលើទេសចរណ៍ឆ្លាតវៃ ដែលមានគោលបំណងលើកស្ទួយវិស័យទេសចរណ៍របស់ប្រទេស ដោយប្រើប្រាស់ប្រព័ន្ធឌីជីថល៕
