វេទិកាបណ្តាញអេកូទេសចរណ៍បឹងទន្លេសាបប្រចាំឆ្នាំលើកទី១ ក្រោមប្រធានបទ “ការពង្រឹងសេវាកម្មទេសចរណ៍ និងអេកូទេសចរណ៍ឆ្ពោះទៅរកការលើកកម្ពស់ជីវភាពសហគមន៍ និងការគ្រប់គ្រងធនធានធម្មជាតិបឹងតំបន់ទន្លេសាបប្រកបដោយនិរន្តរភាព” បានចាប់ផ្តើមកាលពីថ្ងៃព្រហស្បតិ៍។
អញ្ជើញជាអធិបតីក្នុងវេទិកានេះ លោក សុខ សូកេន រដ្ឋមន្ត្រីក្រសួងទេសចរណ៍បានមានប្រសាសន៍ថា បឹងទន្លេសាបមានសក្តានុពលយ៉ាងធំធេងសម្រាប់សហគមន៍ទេសចរណ៍ និងអេកូទេសចរណ៍ ដែលនឹងជួយកម្ពុជាក្នុងការធ្វើពិពិធកម្មផលិតផលទេសចរណ៍សម្រាប់ភ្ញៀវជាតិ និងអន្តរជាតិ។
វេទិកានេះមានការចូលរួមពីភាគីពាក់ព័ន្ធពីវិស័យសាធារណៈ និងឯកជន អង្គការក្រៅរដ្ឋាភិបាលជាដៃគូ អាជ្ញាធរមូលដ្ឋាន និងសហគមន៍ជុំវិញតំបន់ទន្លេសាប ក៏ដូចជាភាគីពាក់ព័ន្ធផ្សេងទៀត។
លោក សុខ សូកេន ដែលជាប្រធានគណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍និងអេកូទេសចរណ៍ផងដែរនោះ បានមានប្រសាសន៍ថា ការអភិវឌ្ឍអេកូទេសចរណ៍និងសហគមន៍ទេសចរណ៍ គឺជាយន្តការមួយដ៏សមស្របសម្រាប់ការអភិវឌ្ឍ និងអភិរក្សធនធានធម្មជាតិ ក្នុងតំបន់ការពារធម្មជាតិប្រកបដោយប្រសិទ្ធភាព ដែលផ្ដល់ឱកាសឱ្យប្រជាពលរដ្ឋមូលដ្ឋានអាចចូលរួមយ៉ាងសកម្ម ក្នុងការសម្រេចចិត្តនិងទាញយកអត្ថប្រយោជន៍ផ្ទាល់ពីទេសចរណ៍ ជាពិសេសការចូលរួមក្នុងការអភិវឌ្ឍមូលដ្ឋាន និងការកាត់បន្ថយភាពក្រីក្រនិងចំណាកស្រុករបស់ប្រជាពលរដ្ឋ។
លោកបានវាយតម្លៃខ្ពស់ចំពោះកិច្ចសហប្រតិបត្តិការរវាងលេខាធិការដ្ឋាននៃគណៈកម្មាធិការជាតិ និងដៃគូពាក់ព័ន្ធ ជាពិសេសអង្គការសម្ព័ន្ធភាពដើម្បីអភិរក្សធនធានជលផល (FACT) និងដៃគូអភិវឌ្ឍន៍ទាំងអស់ រួមទាំងសហភាពអឺរ៉ុប និងអង្គការអុកស្វាមកម្ពុជា សម្រាប់ការគាំទ្រដល់បណ្តាញអេកូទេសចរណ៍តំបន់បឹងទន្លេសាប (TEN)។
លោកបានលើកឡើងថា “ខ្ញុំជឿជាក់យ៉ាងមុតមាំថា TEN បាននឹងកំពុងដើរតួនាទីយ៉ាងសំខាន់ក្នុងការអភិវឌ្ឍន៍ និងអភិរក្សសហគមន៍ទេសចរណ៍ទន្លេសាប និងអេកូទេសចរណ៍ប្រកបដោយប្រសិទ្ធភាព ស្របតាមគោលនយោបាយជាតិអេកូទេសចរណ៍ឆ្នាំ ២០១៩-២០៣០”។
រាជរដ្ឋាភិបាលអាណត្តិទី៧ ក្រោមការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត បន្តរក្សាសន្តិភាព ស្ថិរភាពសង្គម សន្តិភាព សណ្តាប់ធ្នាប់ពេញលេញ និងការអភិវឌ្ឍលើគ្រប់វិស័យ។
លោកបានបន្តថា សន្តិភាពបានធានាដល់វិស័យទេសចរណ៍របស់ប្រទេសកម្ពុជា ដែលត្រូវបានរាជរដ្ឋាភិបាលចាត់ទុកថាជា “មាសបៃតង”។
វាសម្រេចបាននូវកំណើនជាវិជ្ជមានជារៀងរាល់ឆ្នាំ ដែលរួមចំណែកជិត១៣ ភាគរយនៃផលិតផលក្នុងស្រុកសរុប និងផ្តល់ការងារជាច្រើនរួមទាំងដោយផ្ទាល់ និងដោយប្រយោលដល់ប្រជាពលរដ្ឋ។
លោកបានគូសបញ្ជាក់ទៀតថា “ទន្ទឹមនឹងនោះ រាជរដ្ឋាភិបាលអាណត្តិទី៧ បានដាក់ចេញនូវដំណាក់កាលទី១ នៃយុទ្ធសាស្ត្របញ្ចកោណ ដែលចាត់ទុកវិស័យទេសចរណ៍ជាវិស័យអាទិភាពសម្រាប់កំណើនសេដ្ឋកិច្ច។ ជាក់ស្តែង យុទ្ធសាស្រ្តនេះបញ្ជាក់យ៉ាងច្បាស់អំពីកិច្ចខិតខំប្រឹងប្រែងរបស់រាជរដ្ឋាភិបាលក្នុងការលើកកម្ពស់វិស័យទេសចរណ៍បន្ថែមទៀត”។
លោកបានសម្តែងការគាំទ្រក្នុងការរៀបចំវេទិកាបណ្តាញអេកូទេសចរណ៍ធម្មជាតិបឹងទន្លេសាបជារៀងរាល់ឆ្នាំ។ លោកក៏បានគាំទ្រវេទិកាស្រដៀងគ្នានេះសម្រាប់តំបន់អេកូទេសចរណ៍អាទិភាពជាតិចំនួនប្រាំផ្សេងទៀត រួមមានតំបន់អេកូទេសចរណ៍នៅឧទ្យានជាតិព្រះបាទជ័យវរ្ម័ន-នរោត្ដមភ្នំគូលែន តំបន់អេកូទេសចរណ៍ភ្នំក្រវាញ តំបន់អេកូទេសចរណ៍ឆ្នេរ តំបន់អេកូទេសចរណ៍ព្រៃឡង់ និងតំបន់អេកូទេសចរណ៍ឦសាន។
លោក យុក សេងឡុង នាយកប្រតិបត្តិ អង្គការសម្ព័ន្ធភាពដើម្បីអភិរក្សធនធានជលផល (FACT) និងជាអនុប្រធានអចិន្ត្រៃយ៍នៃបណ្តាញអេកូទេសចរណ៍ធម្មជាតិបឹងទន្លេសាប បានគូសបញ្ជាក់ពីគោលបំណងសំខាន់នៃវេទិកាប្រចាំឆ្នាំលើកដំបូងដោយនិយាយថា វាផ្តល់ឱកាសដល់ភាគីពាក់ព័ន្ធក្នុងការអភិវឌ្ឍទំនាក់ទំនងរវាងស្ថាប័នសាធារណៈ ជាតិ និងអន្តរជាតិ អង្គការ និងវិស័យឯកជន បង្កើតឱកាសសម្រាប់ការលក់ និងប្រើប្រាស់ផលិតផល និងសេវាកម្មទេសចរណ៍/អេកូទេសចរណ៍សហគមន៍។
លោបានបន្តថា “វេទិកាប្រចាំឆ្នាំលើកដំបូងនឹងក្លាយជាឱកាសមួយដើម្បីបង្ហាញពីគោលដៅទេសចរណ៍ធម្មជាតិរបស់កម្ពុជានៅលើឆាកអន្តរជាតិ ដោយទទួលបានអត្ថប្រយោជន៍ពីការចូលរួម និងការបំផុសគំនិតពីដៃគូអភិវឌ្ឍន៍ជាតិ និងអន្តរជាតិជាច្រើន”។
វេទិកានេះត្រូវបានគេរំពឹងថានឹងពង្រឹងកិច្ចសហប្រតិបត្តិការរវាងភាគីពាក់ព័ន្ធសំខាន់ៗ លើកកម្ពស់ការយល់ដឹងអំពីគំនិតផ្តួចផ្តើមអេកូទេសចរណ៍ប្រកបដោយនិរន្តរភាព និងអាចឱ្យសហគមន៍មូលដ្ឋានចូលរួមយ៉ាងសកម្មក្នុងគម្រោងអភិវឌ្ឍន៍អេកូទេសចរណ៍នៅតំបន់ទន្លេសាប។
