កម្ពុជាកំពុងពង្រីកការនាំចេញអង្ករទៅកាន់ទីផ្សាររបស់ប្រទេសហ្វីលីពីន ស្វែងរកដៃគូនាំចេញ និងអ្នកទិញដើម្បីបង្កើតភាពជាដៃគូលើកិច្ចសហប្រតិបត្តិការពាណិជ្ជកម្មអង្ករ។
លោកស្រី គឹម ស្រីរ័ត្ន អនុរដ្ឋលេខាធិការក្រសួងពាណិជ្ជកម្ម បានដឹកនាំគណៈប្រតិភូកម្ពុជា រួមទាំងតំណាងមកពីសហព័ន្ធស្រូវអង្ករកម្ពុជា ចូលរួមកម្មវិធីផ្គូផ្គងទីផ្សារនៃវិស័យស្រូវអង្ករ កម្ពុជា-ហ្វីលីពីន នៅសណ្ឋាគារ The Peninsula ទីក្រុងម៉ានីល ប្រទេសហ្វីលីពីន។
រៀបចំដោយក្រសួងពាណិជ្ជកម្មកម្ពុជា ព្រឹត្តិការណ៍នេះបានប្រមូលផ្តុំអ្នកនាំចេញ-នាំចូលសំខាន់ៗក្នុងវិស័យស្រូវអង្ករ នៃប្រទេសទាំងពីរ ក្នុងគោលបំណងស្វែងរកឱកាសនៃការជំរុញពាណិជ្ជកម្មក្នុងវិស័យស្រូវអង្ករ។
លោកស្រីបានអោយដឹងថា “កិច្ចពិភាក្សាផ្តោតលើការពង្រីកការនាំចេញអង្កររបស់កម្ពុជាទៅកាន់ប្រទេសហ្វីលីពីន ការកែលម្អការសម្របសម្រួលពាណិជ្ជកម្ម និងការលើកកម្ពស់គុណភាព និងប្រសិទ្ធភាពសង្វាក់ផ្គត់ផ្គង់”។
លោកស្រីបានបន្ថែមថា ព្រឹត្តិការណ៍ផ្គូផ្គងអាជីវកម្មអង្ករបានពិភាក្សាអំពីវគ្គផ្គូផ្គងពាណិជ្ជកម្មតាមរយៈយន្តការ B2B ដោយជំរុញទំនាក់ទំនងផ្ទាល់រវាងអ្នកនាំចេញអង្ករកម្ពុជា និងអ្នកទទួលទិញហ្វីលីពីន ក្នុងការពង្រឹងភាពជាដៃគូពាណិជ្ជកម្មឱ្យកាន់តែរឹងមាំ និងបង្កើនលទ្ធភាពក្នុងការពង្រីកទីផ្សារអង្ករកម្ពុជាទៅកាន់ប្រទេសហ្វីលីពីន។
លោក សៅ ខេណ្ណារ័ត្ន អនុប្រធានសហព័ន្ធស្រូវអង្ករកម្ពុជា និងសមាជិកសហព័ន្ធស្រូវអង្ករកម្ពុជា បានអមដំណើរគណៈប្រតិភូក្រសួងពាណិជ្ជកម្ម។
សហព័ន្ធស្រូវអង្ករកម្ពុជាបានអោយដឹងថា “ការពិភាក្សានេះគឺមានគោលបំណងពង្រីកទីផ្សារអង្ករកម្ពុជា និងពង្រឹងទំនាក់ទំនងជាមួយអ្នកនាំចូលអង្ករហ្វីលីពីន និងតួអង្គសំខាន់ៗ” ។
កាលពីឆ្នាំមុន កម្ពុជាបាននាំចេញអង្ករចំនួនតិចតួចទៅកាន់ប្រទេសហ្វីលីពីន។
ហ្វីលីពីនកំពុងស្វែងរកការនាំចូលផលិតផលកសិកម្មពីកម្ពុជាដើម្បីបង្កើនការផ្គត់ផ្គង់ស្បៀងអាហាររបស់ខ្លួននេះបើយោងតាមរដ្ឋមន្ត្រីកសិកម្មហ្វីលីពីន Francisco P. Tiu Laurel Jr.
ក្នុងជំនួបនៅទីក្រុងម៉ានីលជាមួយលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ រដ្ឋមន្រ្តីក្រសួងកសិកម្មហ្វីលីពីនបានមានប្រសាសន៍ថា ហ្វីលីពីនមានចំណាប់អារម្មណ៍ក្នុងការនាំចូលផលិតផលកសិកម្មជាច្រើនប្រភេទរួមមានអង្ករ សាច់ជ្រូក សាច់គោ សាច់មាន់ ត្រី និងបន្លែ និងផ្លែឈើជាច្រើនប្រភេទ។
លោកក៏បានកត់សម្គាល់ផងដែរអំពីចំណាប់អារម្មណ៍របស់ហ្វីលីពីនក្នុងការវិនិយោគលើវិស័យម៉ាស៊ីនកិនស្រូវ និងវារីវប្បកម្មរបស់កម្ពុជា។
លោក ឌីត ទីណាបានអញ្ជើញរដ្ឋមន្រ្តីក្រសួងកសិកម្មហ្វីលីពីនមកបំពេញទស្សនកិច្ចនៅកម្ពុជាក្នុងពេលវេលាសមស្របណាមួយ ដើម្បីវាយតម្លៃសក្តានុពលកសិកម្មរបស់ប្រទេស និងសម្របសម្រួលការពិភាក្សារវាងភាគីពាក់ព័ន្ធនៃវិស័យឯកជនមកពីប្រទេសទាំងពីរ។
ភាគីទាំងពីរក៏បានធ្វើជាអធិបតីក្នុងពិធីចុះហត្ថលេខាលើអនុស្សរណៈយោគយល់គ្នាស្តីពីកិច្ចសហប្រតិបត្តិការលើវិស័យកសិកម្ម និងកសិពាណិជ្ជកម្មរវាងកម្ពុជា និងហ្វីលីពីនផងដែរ។
