ក្រសួងកសិកម្ម រុក្ខាប្រមាញ់ និងនេសាទ និងតំបន់ស្វយ័តជនជាតិជាំងក្វាងស៊ីតំបន់ស្វយ័តនៃសាធារណៈរដ្ឋប្រជាមានិតចិន បានចុះហត្ថលេខាលើអនុស្សរណៈនៃការយោគយល់គ្នា ដើម្បីរួមគ្នាលើកកម្ពស់វិស័យកសិកម្ម និងកិច្ចសហប្រតិបត្តិការកាត់បន្ថយភាពក្រីក្រ។
ក្រសួងកសិកម្មនឹងអនុវត្តគម្រោងចំនួនពីរជាមួយតំបន់ស្វយ័តជនជាតិជាំងក្វាងស៊ី រួមមានគម្រោងកិច្ចសហប្រតិបត្តិការឧស្សាហកម្មអង្ករទំនើបក្វាងស៊ី រវាងកម្ពុជា និងចិន និងគម្រោងជំនួយក្វាងស៊ីនៅកម្ពុជាលើកកិច្ចសហប្រតិបត្តិការបច្ចេកវិទ្យាកសិកម្មទំនើប និងការកាត់បន្ថយភាពក្រីក្រ ដែលគម្រោងទាំងពីរនេះស្ថិតក្រោមកិច្ចសហប្រតិបត្តិការច្រករបៀងមច្ឆានិងអង្ករ។
យោងតាមសេចក្តីប្រកាសព័ត៌មានរបស់ក្រសួងកសិកម្ម ដែលចេញផ្សាយនៅថ្ងៃពុធនេះ ការចុះហត្ថលេខានេះធ្វើឡើងរវាងតំណាងក្រសួងកសិកម្មកម្ពុជា និងតំណាងតំបន់ស្វយ័តជនជាតិជាំងក្វាងស៊ី កាលពីថ្ងៃទី២៣ ខែកញ្ញា នៅទីក្រុងណាននីង ខេត្តក្វាងស៊ី ប្រទេសចិន។
លោក ប្រាក់ ដាវីដ រដ្ឋលេខាធិការក្រសួងកសិកម្មបានអោយដឹងនៅក្នុងសន្និសីទកិច្ចសហប្រតិបត្តិការកសិកម្មចិន-អាស៊ានថា ចិន-អាស៊ានមានទំនាក់ទំនងយ៉ាងជិតស្និទ្ធលើគ្រប់វិស័យរួមទាំងវិស័យកសិកម្មផងដែរ។
លោកបានបន្តថា វិស័យកសិកម្មបានដើរតួនាទីយ៉ាងសំខាន់ក្នុងការធានាបាននូវសន្តិសុខស្បៀង ស្របពេលដែលពិភពលោកមានការវិវត្តឥតឈប់ឈរ និងពិបាកគ្រោងទុក។
លោកបានបន្ថែមថា “ដូច្នេះ អាស៊ាន និងចិនចាំបាច់ត្រូវធ្វើការរួមគ្នា ដើម្បីពង្រឹងកិច្ចសហប្រតិបត្តិការបន្ថែមទៀត ដើម្បីធានាសន្តិសុខស្បៀងក្នុងតំបន់”។
លោកបានបញ្ជាក់ថា បច្ចុប្បន្នក្រសួងកសិកម្ម រុក្ខាប្រមាញ់ និងនេសាទ បាននឹងកំពុងជំរុញការបង្កើតសហគមន៍កសិកម្មទំនើប ដើម្បីធានាបាននូវនិរន្តរភាពនៃការផ្គត់ផ្គង់ទាំងបរិមាណ និងគុណភាព ដែលនឹងជួយជំរុញដល់សន្តិសុខស្បៀងក្នុងស្រុក តំបន់ និងសកលផងដែរ។
លោកបានគូសបញ្ជាក់ថា “ទន្ទឹមនឹងនោះ ក្រសួងកសិកម្ម រុក្ខាប្រមាញ់ និងនេសាទ នឹងបន្តពង្រឹងកិច្ចសហប្រតិបត្តិការកសិ-ពាណិជ្ជកម្ម រវាងកម្ពុជា និងអាស៊ាន ព្រមទាំងកម្ពុជា និងចិន ដើម្បីជំរុញកំណើនសេដ្ឋកិច្ច និងរួមគ្នាធានាបាននូវសន្តិសុខស្បៀងរវាងអាស៊ាន និងចិន។
ក្នុងឱកាសផ្តល់បទសម្ភាសន៍ដល់កាសែតខ្មែរថាមស៍កាលពីថ្ងៃព្រហស្បតិ៍ លោកបណ្ឌិត ជ័យ តិច អ្នកស្រាវជ្រាវសេដ្ឋកិច្ចសង្គមបានមានប្រសាសន៍ថា រហូតមកដល់ពេលនេះ ប្រទេសចិនគឺជាដៃគូធំបំផុតរបស់អាស៊ាន ជាពិសេសទាក់ទងនឹងការវិនិយោគឧស្សាហកម្មសម្រាប់ផលប្រយោជន៍ទៅវិញទៅមក ក៏ដូចជាការធ្វើសមាហរណកម្មរវាងដៃគូទាំងពីរ។
លោកបានបន្ថែមថា “ទោះជាយ៉ាងណាក៏ដោយ នៅក្នុងកិច្ចសហប្រតិបត្តិការវិនិយោគចិន-អាស៊ាន ជាពិសេសក្នុងវិស័យកសិកម្ម យើងនៅតែប្រឈមនឹងបញ្ហាមួយចំនួន ជាពិសេសលើបញ្ហាហេដ្ឋារចនាសម្ព័ន្ធ ការដឹកជញ្ជូនទំនិញទៅគ្នាទៅវិញទៅមក ព្រមទាំងអនាម័យ និងភូតគាមអនាម័យ (SPS)”។
សម្រាប់កម្ពុជា ការនាំចូលពីប្រទេសចិនមានចំនួនខ្ពស់ ដោយឡែកការនាំចេញពីកម្ពុជាទាក់ទងនឹងកសិផលនៅមានចំនួនតិច នៅឡើយ។
ទោះជាយ៉ាងនេះក្តី កិច្ចសហប្រតិបត្តិការចិន-អាស៊ានក្នុងវិស័យកសិកម្មបានជួយជំរុញកំណើនសេដ្ឋកិច្ច បង្កើតការងារ និងបង្កើនការនាំចេញកសិផលពីបណ្តាប្រទេសអាស៊ានទៅកាន់ប្រទេសចិន។ វាក៏បានជួយសម្រួលដល់ការផ្ទេរបច្ចេកវិទ្យា ចំណេះដឹង និងការស្រាវជ្រាវ និងការអភិវឌ្ឍ ក៏ដូចជាការរួមចំណែកដល់សន្តិសុខស្បៀងសម្រាប់ភាគីពាក់ព័ន្ធទាំងពីរផងដែរ»។
គួរំលឹកផងដែរថា កាលពីសប្តាហ៍មុន រដ្ឋមន្ត្រីក្រសួងកសិកម្ម លោក ឌិត ទីណា បានបើកកិច្ចប្រជុំដើម្បីពិភាក្សាលើសេចក្តីព្រាងផែនការសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលនៃសាធារណៈរដ្ឋប្រជាមានិតចិន ស្តីពីការអភិវឌ្ឍរួមគ្នានៃច្រករបៀងមច្ឆានិងអង្ករ។
លោកស្រី អ៊ឹម រចនា អ្នកនាំពាក្យក្រសួងកសិកម្ម បានមានប្រសាសន៍ថា សេចក្តីព្រាងផែនការកិច្ចសហប្រតិបត្តិការនេះ មិនទាន់បញ្ចប់នៅឡើយទេ ហើយក្រុមការងារកំពុងបន្តធ្វើការលើកិច្ចការនេះ។
