កាលពីថ្ងៃអង្គារលោកនាយករដ្ឋមន្ត្រី ហ៊ុន ម៉ាណែត បានឯកភាពបង្កើតតំបន់ឧស្សាហកម្មស្វាយចន្ទីនៅខេត្តកំពង់ធំ ដែលអាចបង្កើតប្រភពចំណូលថ្មីសម្រាប់ប្រជាពលរដ្ឋដែលរស់នៅលើដីតំបន់៣។
ថ្លែងក្នុងពិធីបិទសន្និបាតប្រចាំឆ្នាំ ២០២៤ របស់ក្រសួងរៀបចំដែនដី នគរូបនីយកម្ម និងសំណង់ លោកបានមានប្រសាសន៍ថា “អភិបាលខេត្តកំពង់ធំ បានស្នើសុំបង្កើតតំបន់ឧស្សហកម្មស្វាយចន្ទី ហើយខ្ញុំបានឯកភាពលើសំណើនេះ។”
«យើងប្រើដីរដ្ឋសម្រាប់ការអភិវឌ្ឍ មិនមែនដីឯកជនទេ។
រដ្ឋចេញដីខណៈដែលឯកជនចូលរួមសហការគ្នាបង្កើតតំបន់ឧស្សាហកម្មស្វាយចន្ទីនៅខេត្តកំពង់ធំ។
គំនិតផ្តួចផ្តើមនេះផ្តល់ជូនប្រជាពលរដ្ឋដែលរស់នៅតំបន់៣ និងតំបន់ក្បែរនោះនូវជម្រើសក្រៅពីការធ្វើកសិកម្ម ដោយផ្តល់ឱកាសការងារពេញមួយឆ្នាំ»។
លោកក៏បានលើកទឹកចិត្តដល់អភិបាលរាជធានី-ខេត្តទាំងអស់ បន្តកិច្ចខិតខំប្រឹងប្រែងជំរុញការអភិវឌ្ឍនលើវិស័យផ្សេងៗ រួមទាំងតំបន់ឧស្សាហកម្ម និងកសិឧស្សាហកម្ម ដើម្បីជំរុញការផ្លាស់ប្តូរសេដ្ឋកិច្ច។
លោកបានសង្កត់ធ្ងន់ថា ដូច្នេះហើយ ការពឹងផ្អែកលើតំបន់៣នៃបឹងទន្លេសាបសម្រាប់ការចិញ្ចឹមជីវិតនឹងថយចុះបន្តិចម្តង។
ថ្ងៃក្រោយ យើងនឹងគ្រប់គ្រងតំបន់ទាំងនេះប្រកបដោយប្រសិទ្ធភាព ដោយបង្កើតប្រភពចំណូលថ្មីសម្រាប់ប្រជាជននៅទីនោះ”។
លោក អ៊ួន ស៊ីឡុត ប្រធានសមាគមស្វាយចន្ទីកម្ពុជាបានមានប្រសាសន៍ថា លោកឯកភាពនឹងការលើកឡើងរបស់លោកនាយករដ្ឋមន្ត្រី ហ៊ុន ម៉ាណែត ដែលថា ការអភិវឌ្ឍតំបន់ឧស្សាហកម្មនេះគឺជាការប្រឹងប្រែងរួមគ្នា។
ថ្លែងប្រាប់កាសែតខ្មែរថាមស៍ លោកបានបន្តថា សមាគមស្វាយចន្ទីកម្ពុជាក៏បានដើរតួនាទីយ៉ាងសំខាន់ក្នុងការជំរុញការបង្កើតតំបន់កសិឧស្សាហកម្មស្វាយចន្ទីយ៉ាងឆាប់រហ័សផងដែរ។
«តាមខ្ញុំដឹង រដ្ឋបានរៀបចំដី ២០០ ហិកតាសម្រាប់សួនឧស្សាហកម្មនេះ ហើយដំណើរការរៀបចំកំពុងតែបន្ត។
យើងកំពុងធ្វើការដើម្បីធ្វើឱ្យវាលេចចេញជារូបរាងដើម្បីបង្ហាញពីអត្ថប្រយោជន៍នៃសួនឧស្សាហកម្មនេះដល់សាធារណជន»។
“សមាគមស្វាយចន្ទីកម្ពុជាពិតជាចង់បាន សួនកសិករឧស្សហកម្ម មានទម្រង់ដូចតំបន់សេដ្ឋកិច្ចពិសេស ដែលផ្តល់អត្ថប្រយោជន៍ផ្សេងៗដល់វិនិយោគិន។” ។
លោកបានបន្ថែមថា ដូចជាតំបន់សេដ្ឋកិច្ចពិសេសដែរគឺត្រូវការការអភិវឌ្ឍរោងចក្រកសិឧស្សាហកម្ម។
តម្លៃនៃការផលិតអាចទាបជាង និងប្រកួតប្រជែងជាង ប្រសិនបើសួនកសិឧស្សាហកម្មទទួលបានការលើកទឹកចិត្តពិសេស ដូចជាការលើកលែងពន្ធ ការឧបត្ថម្ភធន និងដំណើរការបទប្បញ្ញត្តិដែលសម្រួលស្រដៀងទៅនឹងតំបន់សេដ្ឋកិច្ចពិសេស។
ក្នុងដំណើរទស្សនកិច្ចនៅខេត្តកំពង់ធំ កាលពីខែកញ្ញា លោក ហែម វណ្ឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានជំរុញឱ្យមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តកំពង់ធំ ដើរតួនាទីក្នុងការអនុវត្តជាក់ស្តែងដើម្បីសម្រេចបានចក្ខុវិស័យរបស់រដ្ឋាភិបាលក្នុងការប្រែក្លាយខេត្តកំពង់ធំទៅជាមជ្ឈមណ្ឌលជាតិសម្រាប់កែច្នៃគ្រាប់ស្វាយចន្ទី។
គួររំលឹកផងដែរថា ក្រសួងកសិកម្ម រុក្ខាប្រមាញ់ និងនេសាទ បានដាក់ឱ្យដំណើរការនូវឯកសារស្ដីពីតំបន់ដាំដុះដំណាំស្វាយចន្ទីនៅកម្ពុជាឆ្នាំ២០២៤នៅទូទាំងប្រទេស។
គំនិតផ្តួចផ្តើមនេះមានគោលបំណងជំរុញឧស្សាហកម្មស្វាយចន្ទី និងលើកកម្ពស់ការអនុវត្តកសិកម្មប្រកបដោយចីរភាព។
កម្ពុជាដែលមានផ្ទៃដីដាំស្វាយចន្ទីប្រមាណ៥៨០,១១៦ ហិកតាជាប់ចំណាត់ថ្នាក់លេខបីក្នុងពិភពលោកសម្រាប់ផ្ទៃដីដាំដុះដំណាំនេះ។
ឯកសារនេះបានអោយដឹងថា ចម្ការស្វាយចន្ទីមាននៅក្នុងខេត្តកំពង់ធំ ក្រចេះ ស្ទឹងត្រែង សៀមរាប កំពង់ចាម ឧត្តរមានជ័យ មណ្ឌលគិរី រតនគិរី ព្រះវិហារ ត្បូងឃ្មុំ និងកំពង់ឆ្នាំង។
ក្នុងចំណោមខេត្តនានា កំពង់ធំមានផ្ទៃដីដាំដុះច្រើនជាងគេគឺ ១៤៧.៧០០ ហិកតា បន្ទាប់មកគឺក្រចេះ ១០២.៥០០ ហិកតា និងរតនគិរី ៩៧.២០០ ហិកតា។ យោងតាមរបាយការណ៍របស់សមាគមស្វាយចន្ទីចាប់ពីខែមករា ដល់ខែតុលា ឆ្នាំ២០២៤កម្ពុជាផ្តល់ផលគ្រាប់ស្វាយចន្ទីបានចំនួន ៨៤០,០០០តោន ពោលគឺកើនឡើង២៦ភាគរយបើធៀបនឹងឆ្នាំមុន។
