ក្រសួងទេសចរណ៍ បានរៀបចំផែនការសកម្មភាពជាក់លាក់ដើម្បីបង្កើនចំនួនអ្នកទេសចរឱ្យបាន៧លាននាក់ នៅឆ្នាំ២០២៥
អ្នកនាំពាក្យក្រសួងទេសចរណ៍ បានឲ្យដឹងថា កម្ពុជាបានស្វាគមន៍ភ្ញៀវទេសចរអន្តរជាតិចំនួន ៦,៧ លាននាក់ក្នុងឆ្នាំ ២០២៤ កើនឡើង ២៣ ភាគរយ បើធៀបនឹងឆ្នាំ២០២៣។
លោកស្រី ហ៊ុន ដានី រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានប្រាប់កាសែតខ្មែរថាមស៍កាលពីម្សិលមិញថា ក្រសួងបាននឹងកំពុងដាក់ចេញនូវផែនការសកម្មភាពមួយចំនួន ដើម្បីទាក់ទាញភ្ញៀវអន្តរជាតិឱ្យបានកាន់តែច្រើន។
លោកស្រីបានបញ្ជាក់ថា កម្ពុជាបានទាក់ទាញភ្ញៀវទេសចរបរទេសចំនួន ៦,៧ លាននាក់ ក្នុងឆ្នាំ២០២៤ ដោយភ្ញៀវទេសចរពេញនិយមបំផុតគឺមកពីប្រទេសថៃ វៀតណាម ចិន ឡាវ និងសហរដ្ឋអាមេរិក ព្រមទាំងប្រទេសផ្សេងទៀតក្នុងទ្វីបអឺរ៉ុប។
លោកស្រី ដានី បានចាត់ទុកកំណត់ត្រានេះ ជាកិច្ចខិតខំប្រឹងប្រែងដ៏ខ្លាំងក្លារបស់លោកនាយករដ្ឋមន្ត្រី ហ៊ុន ម៉ាណែត ដែលបានដាក់ចេញនូវគោលនយោបាយមួយចំនួនក្នុងការលើកកម្ពស់វិស័យទេសចរណ៍ និងទាក់ទាញភ្ញៀវទេសចរកាន់តែច្រើន។
លោកស្រី ដានី បានបន្តថា “កត្តាសំខាន់មួយទៀតគឺសន្តិភាព និងសន្តិសុខ ដែលជាលក្ខខណ្ឌចាំបាច់សម្រាប់ទាក់ទាញភ្ញៀវទេសចរកាន់តែច្រើន។ បើសិនជាគ្មានបរិយាកាសសុវត្ថិភាព និងស្ថិរភាពនោះទេ គឺគ្មានជនបរទេសណាហ៊ានមកលេងកម្ពុជាទេ។ ការប្តេជ្ញាចិត្តចំពោះសុវត្ថិភាពនេះដើរតួនាទីយ៉ាងសំខាន់ក្នុងការទាក់ទាញអ្នកដំណើរអន្តរជាតិកាន់តែច្រើនឡើងឱ្យមកកាន់ប្រទេសកម្ពុជា”។
«សន្តិភាព និងសន្តិសុខ គឺជាកត្តាសំខាន់ដែលធានាឱ្យភ្ញៀវទេសចរបរទេសមកពីជុំវិញពិភពលោកមានអារម្មណ៍ទទួលបាននូវការស្វាគមន៍ សុវត្ថិភាព និងផាសុកភាព នៅពេលជ្រើសរើសប្រទេសកម្ពុជាជាគោលដៅទេសចរណ៍របស់ពួកគេ»។
លោកស្រីបានបន្ថែមថា ការលើកកម្ពស់គុណភាពផលិតផលទេសចរណ៍ រួមជាមួយនឹងបដិសណ្ឋារកិច្ច និងសេវាកម្មនានា បានជួយបង្កើនចំនួនភ្ញៀវទេសចរណ៍បរទេសឱ្យមកទស្សនាកម្ពុជា។
ប្រជាជនកម្ពុជាគឺជាប្រជាជាតិមួយដែលពោរពេញដោយស្នាមញញឹម ភាពរីករាយ ជាពិសេសភាពកក់ក្តៅដែលផ្តល់ដោយបុគ្គលិក ដែលបានដើរតួយ៉ាងសំខាន់នៅទូទាំងវិស័យទេសចរណ៍។
លោកស្រី ដានី បានសង្កត់ធ្ងន់ថា លោក ហួត ហាក់ រដ្ឋមន្ត្រីក្រសួងទេសចរណ៍ បាននឹងកំពុងបំពេញភារកិច្ចរបស់លោកដោយស្មារតីសហការ ធ្វើការយ៉ាងជិតស្និទ្ធជាមួយក្រសួង ស្ថាប័នពាក់ព័ន្ធនានា វិស័យឯកជន និងជាពិសេសជាមួយស្ថានទូតនៅកម្ពុជា។ កិច្ចខិតខំប្រឹងប្រែងរបស់លោកបានជួយទាក់ទាញអ្នកវិនិយោគ និងភ្ញៀវទេសចរបរទេសកាន់តែច្រើនមកទស្សនាប្រទេសកម្ពុជា”។
ទាក់ទិននឹងផែនការទាក់ទាញភ្ញៀវទេសចរអន្តរជាតិនៅឆ្នាំ២០២៥ លោកស្រី ដានី បានបញ្ជាក់ថា កម្ពុជាមានគោលបំណងស្វាគមន៍ភ្ញៀវទេសចរអន្តរជាតិប្រមាណ ៧លាននាក់នៅឆ្នាំនេះ។ លោកស្រីបន្តថា ដើម្បីសម្រេចបាននូវកំណើននេះ ក្រសួងទេសចរណ៍ បានរៀបចំបង្កើតនូវផែនការច្បាស់លាស់ជាមួយនឹងសកម្មភាពជាក់លាក់។ ទី១៖ ក្រសួងនឹងសម្រួល និងកែលម្អនីតិវិធីក្នុងការផ្តល់ទិដ្ឋាការអេឡិចត្រូនិកដល់ភ្ញៀវទេសចរបរទេស បន្ទាប់ពីការសម្រេចចិត្តនាពេលថ្មីៗនេះរបស់រដ្ឋាភិបាល ក៏ដូចជាការបញ្ចុះតម្លៃលើទិដ្ឋាការអេឡិចត្រូនិក រួមទាំងតម្លៃទិដ្ឋាការសម្រាប់ប្រភេទទេសចរណ៍ (e-Visa T) ពី ៣៦ ដុល្លារ មកត្រឹម ៣០ ដុល្លារ និងសម្រាប់ប្រភេទធម្មតា (e-Visa E) ពី ៤២ដុល្លារ មក ៣៥ ដុល្លារ។
ទីពីរ៖ ក្រសួងនឹងជំរុញការអភិវឌ្ឍន៍ការតភ្ជាប់ពីតំបន់ទេសចរណ៍របស់កម្ពុជាទៅកាន់គោលដៅទេសចរណ៍សំខាន់ៗ ជាពិសេសការហោះហើរត្រង់ ដើម្បីទាក់ទាញភ្ញៀវទេសចរមកកម្ពុជាកាន់តែច្រើន។
ទី៣៖ ក្រសួងទេសចរណ៍ នឹងជំរុញ និងអភិវឌ្ឍផលិតផលទេសចរណ៍ថ្មីៗ នៅគ្រប់គោលដៅទេសចរណ៍ទូទាំងប្រទេស ដើម្បីពង្រឹង និងធ្វើពិពិធកម្មវិស័យទេសចរណ៍។
លោកស្រីបានមានប្រសាសន៍ថា “រាជរដ្ឋាភិបាលនឹងជំរុញវិស័យទេសចរណ៍កម្ពុជាទាំងក្នុង និងក្រៅប្រទេស ដោយដាក់ប្រទេសជាគោលដៅដែលផ្តល់ភាពកក់ក្តៅ និងសុវត្ថិភាព”។
លោកស្រី ដានី បានបន្ថែមថា ជាចុងក្រោយ កិច្ចខិតខំប្រឹងប្រែងទាំងនេះនឹងបន្តសម្រាប់ការអភិវឌ្ឍធនធានមនុស្ស និងមូលធនមនុស្សក្នុងវិស័យទេសចរណ៍ ដោយធានាថាកម្មករនិយោជិតទាំងអស់មានចំណេះដឹង និងជំនាញចាំបាច់សម្រាប់បំពេញតម្រូវការទីផ្សារ រក្សាការប្រកួតប្រជែងក្នុងទីផ្សារទេសចរណ៍សកល និងរួមចំណែកដល់ការអភិវឌ្ឍន៍សេដ្ឋកិច្ចសង្គមឱ្យកាន់តែទូលំទូលាយ ជាពិសេសក្នុងឧស្សាហកម្មទេសចរណ៍។
ដើម្បីទាក់ទាញភ្ញៀវទេសចរឱ្យកាន់តែច្រើនទៅកាន់គោលដៅសំខាន់ៗ ក្រសួងកំពុងបន្តបង្កើតផែនការយុទ្ធសាស្រ្តក្នុងការផ្សព្វផ្សាយ និងលើកកម្ពស់តំបន់ទេសចរណ៍សំខាន់ៗដូចជា ខេត្តសៀមរាប អង្គរ តំបន់ឆ្នេរ និងតំបន់អេកូទេសចរណ៍ និងតំបន់ទេសចរណ៍ធម្មជាតិនៅតំបន់ភាគខាងកើត។ កិច្ចខិតខំប្រឹងប្រែងទាំងនេះមានគោលដៅបង្ហាញពីការផ្តល់ទេសចរណ៍ចម្រុះរបស់ប្រទេសកម្ពុជា រួមទាំងបេតិកភណ្ឌវប្បធម៌ដ៏សម្បូរបែប និងសម្រស់ធម្មជាតិផងដែរ។
លោកស្រី ដានី បានសង្កត់ធ្ងន់ថា “រដ្ឋមន្ត្រីទេសចរណ៍បាននឹងកំពុងធ្វើការប្រែក្លាយវិស័យទេសចរណ៍កម្ពុជាពីរដូវភ្ញៀវតិច(low season) ទៅជារដូវបៃតង(green season) ដើម្បីទាក់ទាញភ្ញៀវទេសចរពេញមួយឆ្នាំ ដោយធានាថាភ្ញៀវទេសចររីករាយនឹងការផ្តល់ជូនរបស់កម្ពុជាគ្រប់រដូវកាល”។
