ក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃច័ន្ទ បានប្រគល់ភារកិច្ចឱ្យគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា (គ.អ.ឆ.ក) ធ្វើការរៀបចំផែនការរួមមួយដើម្បីប្រែក្លាយខេត្តជាប់មាត់សមុទ្រទាំងអស់ឱ្យទៅជាច្រករបៀងសេដ្ឋកិច្ចរួម។
លោក សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានដឹកនាំកិច្ចប្រជុំមួយជាមួយសមាជិក គ.អ.ឆ.ក និងតំណាងរដ្ឋបាលខេត្ត ដើម្បីពិភាក្សា និងពិនិត្យពីការបង្កើតផែនការរួម ដែលអាចរក្សាបាននូវកំណើន និងការអភិរក្ស ប្រើប្រាស់សក្តានុពល និងលក្ខខណ្ឌអំណោយផលនៅក្នុងខេត្តជាប់មាត់សមុទ្រ។
លោកបានកត់សម្គាល់ថា “គំនិតផ្តួចផ្តើមនេះគឺដើម្បីទាក់ទាញទេសចរណ៍ ការវិនិយោគ និងពាណិជ្ជកម្ម ខណៈរក្សាបាននូវស្ថានភាពតំបន់ឆ្នេរជាច្រករបៀងសេដ្ឋកិច្ចដ៏សំខាន់សម្រាប់ប្រទេស ក្នុងគោលបំណងបង្កើតឱកាសការងារ និងបង្កើតប្រាក់ចំណូលដ៏សំខាន់សម្រាប់សហគមន៍មូលដ្ឋាននៅក្នុងខេត្តទាំងនេះ” ។
ក្នុងឱកាសនោះដែរ ក៏មានវត្តមានចូលរួមពី លោក អ៊ាង សុផល្លែត រដ្ឋមន្ត្រីក្រសួងបរិស្ថាន លោក លី យ៉ុងផាត់ ប្រធានសមាគមឧកញ៉ាកម្ពុជា លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក គង់ វិមាន អគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា និងលោក នី ផល្លី រដ្ឋលេខាធិការក្រសួងទេសចរណ៍។
បន្ទាប់ពីកិច្ចពិភាក្សារួច លោកឧបនាយករដ្ឋមន្ត្រីបានប្រគល់ភារកិច្ចទៅលេខាធិការដ្ឋាន គ.អ.ឆ.ក ដើម្បីធ្វើការពិនិត្យការចុះបញ្ជីដីធ្លី និងពិនិត្យសក្ដានុពលនៃតំបន់ឆ្នេរទាំងអស់ ដើម្បីបង្កើតច្រករបៀងសេដ្ឋកិច្ចរួម។
លោក ប៊ុន យោង អភិបាលរងនៃគណៈអភិបាលខេត្តកែប និងជាអ្នកនាំពាក្យរដ្ឋបាលខេត្តកែប បានប្រាប់កាសែតខ្មែរថាមស៍ថា អាជ្ញាធរខេត្តកំពុងធ្វើការយ៉ាងជិតស្និទ្ធជាមួយដៃគូអភិវឌ្ឍន៍ ដើម្បីផ្តល់អាទិភាពដល់គម្រោងហេដ្ឋារចនាសម្ព័ន្ធសំខាន់ៗ។
លោកបានបន្ថែមថា “ទាំងនេះរួមមានការអភិវឌ្ឍន៍ផ្លូវជាប់មាត់សមុទ្រ ប្រព័ន្ធធារាសាស្ត្រទំនើប និងបណ្តាញលូប្រកបដោយប្រសិទ្ធភាព ដើម្បីធានាបាននូវកំណើនប្រកបដោយចីរភាព ទន្ទឹមនឹងការកាត់បន្ថយផលប៉ះពាល់បរិស្ថាន”។
លោកអភិបាលរងខេត្តបានជំរុញឱ្យអ្នកវិនិយោគធ្វើការសិក្សាស្វែងយល់ពីខេត្តកែបឱ្យបានឆាប់ ព្រោះការមើលឃើញពីវឌ្ឍនភាពនៃការផ្លាស់ប្តូរដោយផ្ទាល់នឹងផ្តល់ឱ្យពួកគេនូវអត្ថប្រយោជន៍ពិសេសមួយដើម្បីទាញយកប្រយោជន៍ពីឱកាសអាជីវកម្មនាពេលអនាគត មុនពេលអ្នកផ្សេងទៀតដឹងពីសក្តានុពលពេញលេញរបស់ខ្លួន។
សូមជម្រាបថា ព្រះរាជាណាចក្រកម្ពុជា មានខេត្តជាប់មាត់សមុទ្រចំនួន ៤ ដែលមានដូចជា កោះកុង កំពត កែប និងខេត្តព្រះសីហនុ ដែលផ្តល់សក្តានុពលសេដ្ឋកិច្ច និងទេសចរណ៍យ៉ាងសំខាន់ ដោយសារឆ្នេរស្អាត សំបូរទៅដោយជីវៈចម្រុះ និងសហគមន៍នេសាទរស់រវើក។
ខេត្តទាំងនេះទាក់ទាញភ្ញៀវទេសចរជាតិ និងអន្តរជាតិ បង្ហាញពីឱកាសសម្រាប់ការវិនិយោគលើហេដ្ឋារចនាសម្ព័ន្ធទេសចរណ៍ អេកូទេសចរណ៍ បដិសណ្ឋារកិច្ច និងឧស្សាហកម្មក្នុងស្រុក ដោយបានជំរុញដល់កំណើនសេដ្ឋកិច្ច។
យោងតាមសេចក្តីប្រកាសរបស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ខណៈដែលផ្លូវជាតិលេខ ៤៨ និងផ្លូវជាតិលេខ១០ នឹងបញ្ចប់ក្នុងពេលឆាប់ៗនេះ ហេដ្ឋារចនាសម្ព័ន្ធទាំងនេះនឹងតភ្ជាប់ជាមួយសហគមន៍នេសាទជាច្រើនដែលលាតសន្ធឹងពីខេត្តកោះកុងទៅខេត្តកែប ក្លាយជាគោលដៅទេសចរណ៍ក្នុងស្រុកថ្មី ជាពិសេសសម្រាប់ភ្ញៀវទេសចរក្នុងស្រុក ដែលនឹងផ្តល់ឱកាសការងារ និងប្រាក់ចំណូលបន្ថែមជាច្រើនទៀត សម្រាប់ប្រជាជនកម្ពុជា។
