រាជរដ្ឋាភិបាលកម្ពុជា បានអនុម័តលើការលើកទឹកចិត្តពិសេសសម្រាប់គម្រោងវិនិយោគ និងអាជីវកម្មចំនួន ៤២គម្រោង នៅក្នុងខេត្តព្រះសីហនុ។ ជាមួយនឹងថវិកាសរុបចំនួន ៥៦៥ លានដុល្លារ ដោយគម្រោងទាំងនេះត្រូវបានគេរំពឹងថានឹងបង្កើតការងារជិត ៧,៥០០ កន្លែងសម្រាប់ប្រជាពលរដ្ឋ។
មួយថ្ងៃបន្ទាប់ពីក្រសួងសេដ្ឋកិច្ច និងហិរញ្ញវត្ថុ បានប្រកាសពីការបន្តពន្យាការលើកទឹកចិត្តពិសេស លោក ហ៊ាន សាហ៊ីប ទីប្រឹក្សាលោកនាយករដ្ឋមន្ត្រី បានដឹកនាំគណៈប្រតិភូដើម្បីពិនិត្យអ្នកដាក់ពាក្យស្នើសុំវិនិយោគក្រោម ‘កម្មវិធីពិសេសដើម្បីជំរុញការវិនិយោគនៅក្នុងក្របខណ្ឌខេត្តព្រះសីហនុ ឆ្នាំ២០២៤’ នៅរាជធានីភ្នំពេញ កាលពីថ្ងៃទី២៣ ខែមករា។
លោក សាហ៊ីប ដែលជាប្រធានក្រុមការងារជំរុញការវិនិយោគខេត្តព្រះសីហនុ (SHVIP) បានអនុម័តលើការលើកទឹកចិត្តពិសេសសម្រាប់គម្រោងចំនួន ១៥ ទាក់ទងនឹងអគារជាប់គាំង គម្រោងថ្មីចំនួន ១២ គម្រោងពង្រីកចំនួន ៣ និងប្រតិបត្តិការអាជីវកម្មចំនួន ១២ ដែលមានទុនវិនិយោគសរុបចំនួន ៥៦៥ លានដុល្លារ។
លោកបានមានប្រសាសន៍ថា រាជរដ្ឋាភិបាលបានសម្រេចបន្ត “កម្មវិធីពិសេសដើម្បីជំរុញការវិនិយោគនៅក្នុងខេត្តព្រះសីហនុ ឆ្នាំ២០២៤” រហូតដល់ដំណាច់ឆ្នាំ២០២៥ ដោយរក្សាបាននូវវិធានការដែលមានស្រាប់ ដើម្បីគាំទ្រដល់ការអភិវឌ្ឍន៍ខេត្ត និងសម្រេចបាននូវគោលដៅរបស់រដ្ឋាភិបាល។
លោក សាហ៊ីប បានមានប្រសាសន៍ថា “គម្រោងដែលត្រូវបានអនុម័តចំនួន ៤២គម្រោង រួមមានឃ្លាំងគយ រមណីយដ្ឋាននៅកោះរ៉ុងសន្លឹម គម្រោងអេកូទេសចរណ៍ គម្រោងសួនឧស្សាហកម្ម សណ្ឋាគារ និងអគារពហុមុខងារ ដែលត្រូវបានគេប៉ាន់ស្មានថានឹងបង្កើតការងារប្រហែល ៧,៣៥០ កន្លែងសម្រាប់ប្រជាពលរដ្ឋនៅក្នុងខេត្តជាប់មាត់សមុទ្រនេះ”។
ឆ្លើយតបទៅនឹងសំណួររបស់កាសែតខ្មែរថាមស៍ អំពីសក្ដានុពលនៃវិស័យភស្តុភារនៅក្នុងខេត្តព្រះសីហនុ លោក ជា ចាន់ដារ៉ា ប្រធានសមាគមធុរកិច្ចភស្តុភារ និងខ្សែច្រវាក់ផ្គត់ផ្គង់នៅកម្ពុជា (Logistics and Supply Chain Business Association-LOSCBA) បានគូសបញ្ជាក់ថា រាជរដ្ឋាភិបាលកម្ពុជាបានអនុវត្តគំនិតផ្តួចផ្តើមជាច្រើនដើម្បីដោះស្រាយបញ្ហារាំងស្ទះនៃការសាងសង់នៅក្នុងខេត្តមាត់សមុទ្រដ៏សំខាន់នេះ។
លោក ជា ចាន់ដារ៉ា បានមានប្រសាសន៍ថា “កិច្ចខិតខំប្រឹងប្រែងទាំងនេះបាននាំមកនូវលទ្ធផលជាក់ស្តែង ទោះបីជាមានបញ្ហាប្រឈមបន្ទាប់ពីការចាកចេញរបស់អ្នកវិនិយោគចិន ជាពិសេសក្នុងការបញ្ចប់ការសាងសង់អគារធំៗជាច្រើនក៏ដោយ”។
លោកបានបន្ថែមថា ដោយមើលឃើញពីទីតាំងរបស់ខេត្ត និងសក្ដានុពលខ្លាំងសម្រាប់សកម្មភាពនាំចេញ និងនាំចូល លោកនាយករដ្ឋមន្ត្រី ហ៊ុន ម៉ាណែត នាពេលថ្មីៗនេះ បានដឹកនាំបង្កើតតំបន់ភស្តុភារ ដើម្បីពង្រឹងសមត្ថភាពបន្ថែមទៀត។
លោក ចាន់ដារ៉ា បានសង្កត់ធ្ងន់ថា ខេត្តព្រះសីហនុ គឺជាទីតាំងកំពង់ផែដ៏ធំបំផុតក្នុងប្រទេស ដោយបរិមាណទំនិញ គ្រប់គ្រងការដឹកជញ្ជូនតាមកប៉ាល់សំខាន់ៗជារៀងរាល់ឆ្នាំ។ ដោយផ្តោតលើតំបន់សេដ្ឋកិច្ចពិសេស និងឧស្សាហ៍កម្មរបស់ខ្លួន ខេត្តបង្ហាញពីសក្តានុពលដ៏សន្ធឹកសន្ធាប់សម្រាប់ការដឹកជញ្ជូន និងឱកាសវិនិយោគ។
លោក មាន សុវណ្ណារិទ្ធ សហស្ថាបនិក និងជានាយកប្រតិបត្តិនៃក្រុមហ៊ុន DeGrand Realty Co., Ltd បានសម្តែងសុទិដ្ឋិនិយមអំពីសក្ដានុពលនៃខេត្តព្រះសីហនុ ដោយបញ្ជាក់ថា ប្រសិនបើតួលេខនៃការវិនិយោគ និងសកម្មភាពអនុវត្តស្របតាមគោលដៅដែលបានកំណត់ រួមជាមួយនឹងការចូលរួមពីអ្នកវិនិយោគ លោកជឿជាក់ថា សេដ្ឋកិច្ចរបស់ខេត្តនេះនឹងមានសក្ដានុពលកើនឡើងគួរឱ្យកត់សម្គាល់ សម្រាប់ប្រទេសទាំងមូល ដូចការរំពឹងទុកដោយរដ្ឋាភិបាលកាលពី៥ឆ្នាំមុន»។
“គម្រោងទាំងនេះមិនត្រឹមតែបង្កើតផលចំណេញផ្នែកសេដ្ឋកិច្ចប៉ុណ្ណោះទេ ប៉ុន្តែថែមទាំងបង្កើតការងារសម្រាប់ពលរដ្ឋក្នុងស្រុក និងទាក់ទាញភ្ញៀវទេសចរមកខេត្តកាន់តែច្រើន។ លោកបានពន្យល់ថា បច្ចុប្បន្ន ទេសចរណ៍ឆ្លងកាត់ទីរួមខេត្ត ហើយផ្តោតលើកោះជុំវិញ ដែលនាំឱ្យសកម្មភាពអាជីវកម្មក្នុងមូលដ្ឋានធ្លាក់ចុះ»។
លោកបានសង្កត់ធ្ងន់ពីសារៈសំខាន់នៃគម្រោងទាំងនេះក្នុងការបង្កើតឱកាសការងារ និងជំរុញសកម្មភាពអាជីវកម្មនៅក្នុងខេត្តព្រះសីហនុ និងខេត្តដែលនៅក្បែរខាង ដើម្បីផ្តល់ផលប្រយោជន៍ដល់ប្រជាពលរដ្ឋក្នុងមូលដ្ឋាន ដែលអាចបង្កើនប្រាក់ចំណូល និងកាត់បន្ថយការធ្វើចំណាកស្រុកបានយ៉ាងច្រើន។
លោក សុវណ្ណារិទ្ធ ក៏បានឆ្លុះបញ្ជាំងពីឥទ្ធិពលនៃវិនិយោគិនចិន ដោយបានគូសបញ្ជាក់ពីរបៀបដែលវត្តមានរបស់ពួកគេបានផ្លាស់ប្តូរខេត្តយ៉ាងខ្លាំង មុនពេលពួកគេចាកចេញពីទីក្រុងឆ្នេរសមុទ្រនៅចុងឆ្នាំ២០១៩ ប៉ុណ្ណោះ។
លោកបានប្រាប់កាសែតខ្មែរថាមស៍ថា “ការវិនិយោគរបស់ជនជាតិចិនបានប្រែក្លាយខេត្តពីគោលដៅទេសចរណ៍ឆ្នេរសមុទ្រ និងដ៏ពេញនិយមក្នុងចំណោមភ្ញៀវអន្តរជាតិ ទៅជាអ្វីដែលស្រដៀងនឹងមជ្ឈមណ្ឌលពាណិជ្ជកម្មដូចជាទីក្រុងសៀងហៃ”។
គួរជម្រាបថា កាលពីថ្ងៃទី២២ ខែមករា ក្រសួងសេដ្ឋកិច្ច និងហិរញ្ញវត្ថុ បានធ្វើការប្រកាសពីសេចក្តីសម្រេចរបស់ខ្លួនក្នុងការពន្យាពេលនៃការលើកទឹកចិត្តពិសេសនៅក្នុងខេត្តព្រះសីហនុ ដើម្បីជំរុញសកម្មភាពធុរកិច្ច និងពន្លឿនការអភិវឌ្ឍន៍ក្នុងខេត្តជាប់មាត់សមុទ្រដ៏មានសក្តានុពលមួយនេះ។
សេចក្តីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ការលើកទឹកចិត្តនេះផ្តោតលើការស្តារឡើងវិញនូវគម្រោងអគារដែលជាប់គាំង ការទាក់ទាញការវិនិយោគថ្មី និងការពង្រីកគម្រោងដែលមានស្រាប់ ដោយក្រុមការងារជំរុញការវិនិយោគខេត្តព្រះសីហនុ ត្រួតពិនិត្យ និងអនុវត្តវិធានការទាំងនេះជា “ច្រកចេញចូលតែមួយ” សម្រាប់វិនិយោគិន។
