កាលពីថ្ងៃអង្គារក្រុមហ៊ុន Unique Noble Trading Co. Ltd បានបើកការដ្ឋានសាងសង់រោងចក្រកែច្នៃគ្រាប់ស្វាយចន្ទីថ្មីមួយនៅក្នុងខេត្តកំពង់ធំ ខណៈដែលកម្ពុជានៅតែបន្តពង្រីកឧស្សាហកម្មដែលមានតម្លៃរាប់ពាន់លានដុល្លារ។
លោក ជា វ៉ាន់ចាន់អភិបាលរងខេត្តកំពង់ធំបានមានប្រសាសន៍ថា រោងចក្រថ្មីនេះ គឺជាការវិនិយោគទាន់ពេលវេលា ស្របតាមគោលនយោបាយរបស់រាជរដ្ឋាភិបាលក្នុងការលើកកម្ពស់វិស័យគ្រាប់ស្វាយចន្ទី។
លោកបានបន្តថា«រោងចក្រនឹងចូលរួមចំណែកយ៉ាងសំខាន់ក្នុងការលើកកម្ពស់ផលិតភាពគ្រាប់ស្វាយចន្ទី និងជីវភាពរស់នៅរបស់ប្រជាជន»។
អ្នកស្រី ពិន ភិរម្យ អគ្គនាយិកាក្រុមហ៊ុន Unique Noble បានមានប្រសាសន៍ថា រោងចក្រនឹងកែច្នៃគ្រាប់ចំនួន ៣០ តោនក្នុងមួយថ្ងៃ ហើយនឹងបង្កើតការងារបាន ២០០ ទៅ ៤០០ កន្លែង។
អ្នកស្រីបានបន្តថា រោងចក្រនឹងកែច្នៃផ្លែស្វាយចន្ទី និងសំបកគាបចេញយកជាប្រេង និងជីកសិកម្ម។
រោងចក្រនេះស្ថិតនៅភូមិសាលាពពេល ឃុំសាលាវិស័យ ស្រុកប្រាសាទបល្ល័ង្ក។
ឧស្សាហកម្មគ្រាប់ស្វាយចន្ទីរបស់កម្ពុជាមានកំណើនគួរឱ្យកត់សម្គាល់ ដោយការផលិតបានឈានដល់ ៨៤០,០០០ តោនក្នុងរយៈពេល១០ខែដំបូងនៃឆ្នាំនេះ កើនឡើង២៦ ភាគរយធៀបនឹងរយៈពេលដូចគ្នាកាលពីឆ្នាំមុន។
គ្រាប់ស្វាយចន្ទីប្រមាណ៧៩០,០០០ តោនត្រូវបាននាំចេញទៅប្រទេសវៀតណាមសម្រាប់កែច្នៃ ដែលរក ចំណូលបានជាង១ ពាន់លានដុល្លារ កើនឡើង៣១ ភាគរយ។
សមាគមន៍ស្វាយចន្ទីកម្ពុជាកំពុងធ្វើពិពិធកម្មទីផ្សារនាំចេញ ដោយគ្រាប់ស្វាយចន្ទីដែលបានកែច្នៃត្រូវបាននាំចេញភាគច្រើនទៅកាន់ប្រទេសចិន ជប៉ុន និងអឺរ៉ុប។
លោក អ៊ួន ស៊ីឡុត ប្រធានសមាគមន៍ស្វាយចន្ទីកម្ពុជា បានមានប្រសាសន៍ថា ឧស្សាហកម្មគ្រាប់ស្វាយចន្ទីកំពុងក្លាយជាផ្នែកសំខាន់កាន់តែខ្លាំងនៃវិស័យកសិកម្មរបស់កម្ពុជា។
កម្ពុជាមានផ្ទៃដីជាង ៥៨០,០០០ ហិកតា ដែលដាំស្វាយចន្ទី។
ទិន្នផលជាមធ្យមគឺប្រហែល ១,៥ តោនក្នុងមួយហិកតា។ យោងតាមទិន្នន័យរបស់សមាគមន៍នៅក្នុងតំបន់ខ្លះ តួលេខនោះមានចំនួន ៤ តោនក្នុងមួយហិកតា។
ខេត្តកំពង់ធំត្រៀមក្លាយជាមជ្ឈមណ្ឌលផលិតគ្រាប់ស្វាយចន្ទីរបស់កម្ពុជា។
រដ្ឋាភិបាលកំពុងគាំទ្រដល់ឧស្សាហកម្មនេះ តាមរយៈការផ្តល់ហិរញ្ញប្បទានពីធនាគារអភិវឌ្ឍន៍ជនបទ និងកសិកម្ម និងធនាគារសហគ្រាធុនតូច និងមធ្យមកម្ពុជា។
ប្រទេសផលិតគ្រាប់ស្វាយចន្តីធំបំផុតរបស់ពិភពលោកគឺប្រទេសកូតឌីវ័រនៅអាហ្វ្រិកខាងលិច។
ក្រសួងកសិកម្ម រុក្ខាប្រមាញ់ និងនេសាទ បានព្យាករណ៍ថា កម្ពុជានឹងក្លាយជាប្រទេសផលិតគ្រាប់ស្វាយចន្ទីលំដាប់កំពូលលើពិភពលោកនៅឆ្នាំ២០៣០។
កម្ពុជាបាននាំមុខប្រទេសឥណ្ឌាជាប្រទេសផលិតធំជាងគេទីពីរកាលពីដើមឆ្នាំនេះ ដោយសារការប្រែប្រួលអាកាសធាតុបានប៉ះពាល់ដល់ដំណាំរបស់ប្រទេសនោះ។
ក្រោមគោលនយោបាយឧស្សាហកម្មគ្រាប់ស្វាយចន្ទីរបស់រដ្ឋាភិបាលឆ្នាំ២០២២-២០២៧ ទឹកប្រាក់ចំនួន៣២៩ លានដុល្លារនឹងត្រូវវិនិយោគក្នុងវិស័យនេះ ដើម្បីបង្កើតហេដ្ឋារចនាសម្ព័ន្ធ និងកែលម្អសមត្ថភាពកែច្នៃ។
ផែនការរបស់រដ្ឋាភិបាលគឺកែច្នៃគ្រាប់ស្វាយចន្ទីបន្ថែមទៀតនៅក្នុងប្រទេសកម្ពុជា ដើម្បីបន្ថែមតម្លៃដល់ឧស្សាហកម្ម។
រោងចក្រថ្មីតម្លៃ១២លានដុល្លារដែលសាងសង់ដោយ CSNC របស់ប្រទេសសិង្ហបុរី ជារោងចក្រកែច្នៃដ៏ធំបំផុតរបស់កម្ពុជានឹងចាប់ផ្តើមដំណើរការផលិតនៅខែមីនា។
រោងចក្រនឹងអាចដំណើរការកែច្នៃបាន៤០តោនក្នុងមួយថ្ងៃ ឬប្រហែល ១២,០០០តោនក្នុងមួយឆ្នាំ។
