សមាគមស្វាយចន្ទីកម្ពុជា និងសហព័ន្ធស្វាយចន្ទីកម្ពុជា កាលពីថ្ងៃអង្គារ បានចុះហត្ថលេខាលើអនុស្សរណៈនៃការយោគយល់គ្នា ចំនួនពីរជាមួយសមាគមសណ្ឋាគារកម្ពុជា នៅក្រសួងពាណិជ្ជកម្ម។
ពិធីចុះហត្ថលេខានេះ ធ្វើឡើងក្រោមអធិបតីភាព លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម និងមានការអញ្ជើញចូលរួមពីថ្នាក់ដឹកនាំ និងមន្ត្រីមកពីក្រសួង នាយកប្រតិបត្តិមកពីផ្សារទំនើប ម៉ាត និងសហគ្រាសស្វាយចន្ទីផងដែរ។
យោងតាមសេចក្តីប្រកាសព័ត៌មានរបស់ក្រសួងពាណិជ្ជកម្ម បានឱ្យដឹងថា អនុស្សរណៈយោគយល់គ្នាទាក់ទងនឹង “កិច្ចសហប្រតិបត្តិការលើការការជំរុញការប្រើប្រាស់ផលិតផលស្វាយចន្ទីកម្ពុជា”។
ក្នុងឱកាសពិធីនោះ អនុស្សរណៈយោគយល់គ្នាចំនួនពីរត្រូវបានចុះហត្ថលេខា គឺទី១៖ រវាងលោក ហ៊ី សុធា ប្រធានសមាគមសណ្ឋាគារកម្ពុជា និងលោក អាន តារា ប្រធានសហព័ន្ធស្វាយចន្ទីកម្ពុជា និងទី២៖ រវាងលោក ហ៊ី សុធា និងលោក អ៊ួន ស៊ីឡូត ប្រធានសមាគមស្វាយចន្ទីកម្ពុជា។
សមាគមសណ្ឋាគារកម្ពុជា បានប្តេជ្ញាចិត្តក្នុងការទិញគ្រាប់ស្វាយចន្ទីក្នុងរយៈពេលបីឆ្នាំ ជាមួយនឹងតម្រូវការប្រចាំឆ្នាំចំនួន ២៥០ តោន ដែល ២១០ តោននឹងត្រូវប្រើប្រាស់សម្រាប់កែច្នៃធ្វើជាអាហារ នំ និងភេសជ្ជៈ ខណៈដែល ៤០ តោន ស្មើនឹង ៤០០,០០០ កញ្ចប់នឹងត្រូវលក់ជាផលិតផលគ្រាប់ស្វាយចន្ទីវេចខ្ចប់សម្រាប់មីនីបារ និងបន្ទប់សណ្ឋាគារ។
សេចក្តីប្រកាសព័ត៌មានបានឱ្យដឹងថា “គោលដៅចម្បងនៃកិច្ចសហប្រតិបត្តិការនេះគឺដើម្បីជំរុញការប្រើប្រាស់ផលិតផលស្វាយចន្ទីក្នុងវិស័យបដិសណ្ឋារកិច្ច លើកកម្ពស់ការកែច្នៃ ការប្រើប្រាស់ និងការចែកចាយផលិតផលស្វាយចន្ទីកម្ពុជា”។
លោក អ៊ួន ស៊ីឡូត ប្រធានសមាគមស្វាយចន្ទីកម្ពុជា បានប្រាប់កាសែតខ្មែរថាមស៍ថា អនុស្សរណៈនៃការយោគយល់គ្នា មានអត្ថប្រយោជន៍ខ្ពស់ ហើយនឹងជួយជំរុញការលក់ និងការប្រើប្រាស់ក្នុងស្រុក ដោយធ្វើឱ្យដំណើរការនេះកាន់តែងាយស្រួល។
លោកបានមានប្រសាសន៍ថា “យើងកំពុងជំរុញការលក់ និងការប្រើប្រាស់ក្នុងស្រុកយ៉ាងសកម្ម” ដោយលោកបន្ថែមថា ក្រសួងពាណិជ្ជកម្មកំពុងគាំទ្រយើងតាមរយៈការជួយផ្សព្វផ្សាយ និងលក់គ្រាប់ស្វាយចន្ទីរបស់យើងនៅតាមព្រលានយន្តហោះ ផ្សារទំនើប ហើយឥឡូវនេះតាមរយៈភាពជាដៃគូជាមួយសមាគមសណ្ឋាគារកម្ពុជា សមាគមភោជនីយដ្ឋានកម្ពុជា និងសមាគមចុងភៅកម្ពុជា”។
លោកបានបន្ថែមថា៖ «យើងត្រូវតែធ្វើអ្វីគ្រប់យ៉ាងដែលយើងអាចធ្វើបានដើម្បីផ្សព្វផ្សាយគ្រាប់ស្វាយចន្ទីរបស់យើងនៅក្នុងស្រុក។ ខណៈដែលទីផ្សារបរទេសមានសារៈសំខាន់ យើងក៏ត្រូវតែផ្តល់អាទិភាព និងបង្កើនការប្រើប្រាស់ផលិតផលរបស់យើងនៅក្នុងទីផ្សារក្នុងស្រុកផងដែរ»។
យោងតាមសមាគមស្វាយចន្ទីកម្ពុជា ចាប់ពីខែមករា ដល់ខែតុលា ឆ្នាំ២០២៤ កម្ពុជាផលិតគ្រាប់ស្វាយចន្ទីបានចំនួន ៨៤០,០០០ តោន ពោលគឺកើនឡើង ២៦ ភាគរយបើធៀបនឹងឆ្នាំមុន។
ក្នុងនោះ ជាង ៧៩០,០០០ តោន ត្រូវបាននាំចេញទៅប្រទេសវៀតណាម បង្កើតចំណូលបាន ១.១១០ ប៊ីលានដុល្លារ កើនឡើង ៣៦ ភាគរយ។ បន្ថែមពីនេះ តម្លៃគ្រាប់ស្វាយចន្ទីបានកើនឡើង ៩ ភាគរយធៀបនឹងរយៈពេលដូចគ្នាក្នុងឆ្នាំ ២០២៣។
