សមាគមសម្ព័ន្ធដំឡូងមីកម្ពុជា-ចិន (CCCAA) ត្រូវបានបង្កើតឡើងជាផ្លូវការកាលពីថ្ងៃព្រហស្បតិ៍ ដើម្បីលើកកម្ពស់ការនាំចេញផលិតផលកសិកម្មទៅកាន់ប្រទេសចិន និងទីផ្សារពិភពលោក។
ពិធីសម្ពោធសមាគមនេះប្រព្រឹត្តទៅក្រោមអធិបតីភាពលោក វ៉ា រុតសាន រដ្ឋលេខាធិការក្រសួងពាណិជ្ជកម្មនិងតំណាងសមាជិកសមាគមមកពីវិស័យកសិកម្ម។
គោលបំណងនៃការបង្កើតសម្ព័ន្ធដំឡូងមីកម្ពុជា-ចិន គឺដើម្បីលើកកម្ពស់ការអភិវឌ្ឍន៍ប្រកបដោយគុណភាពខ្ពស់នៃខ្សែសង្វាក់ឧស្សាហកម្មដំឡូងមីនៅកម្ពុជា។
សមាគមសម្ព័ន្ធដំឡូងមីកម្ពុជា-ចិនបម្រើជាស្ពានតភ្ជាប់អ្នកវិនិយោគចិន និងកម្ពុជាក្នុងវិស័យដំឡូងមី។ ភាគីចិននឹងជួយកសិករកម្ពុជានូវបច្ចេកទេសផលិតកម្ម និងដាំដុះ រួមទាំងសម្ភារៈផ្សេងៗដើម្បីជួយកម្ពុជាប្រកួតប្រជែងជាមួយប្រទេសផ្សេងៗ។
លោក វ៉ា រុតសានបាយវាយតម្លៃខ្ពស់ចំពោះសមាគមដែលទើបបង្កើតថ្មីសម្រាប់ការអភិវឌ្ឍន៍ដំឡូងមីនៅកម្ពុជា។
លោកបន្តថា “សមាគមសម្ព័ន្ធដំឡូងមីកម្ពុជា-ចិន នឹងផ្តល់ជំនួយបច្ចេកទេស ដើម្បីជួយជំរុញយុទ្ធសាស្ត្រ ដែលអាចផលិតបានកាន់តែច្រើន ដោយសារភាគីចិនមានរោងចក្រ និងបច្ចេកវិទ្យាក្នុងការជំរុញទិន្នផល ដែលធ្វើឲ្យកសិករទទួលបានផលចំណេញ”។
លោកបានបន្ថែមថា វាក៏អាចទាក់ទាញអ្នកវិនិយោគឲ្យមកកែច្នៃដំឡូងមីនៅកម្ពុជាដោយបង្កើនតម្លៃបន្ថែម។
នៅក្នុងព្រឹត្តិការណ៍នេះ អនុស្សរណៈនៃការយោគយល់គ្នាមួយត្រូវបានចុះហត្ថលេខាក្នុងចំណោមភាគីពាក់ព័ន្ធសំខាន់ៗមួយចំនួន ក្នុងគោលបំណងជំរុញការនាំចេញផលិតផលកសិកម្មទៅកាន់ប្រទេសចិន និងទីផ្សារពិភពលោក។ អនុស្សរណៈយោគយល់គ្នានេះ បង្ហាញពីកិច្ចខិតខំប្រឹងប្រែងរួមគ្នា ដើម្បីលើកកម្ពស់ការអភិវឌ្ឍវិស័យកសិកម្មនៅកម្ពុជា។
ភាគីពាក់ព័ន្ធរួមមាន សមាគមសម្ព័ន្ធដំឡូងមីកម្ពុជា-ចិន CPSF សមាគមគ្រាប់ស្វាយចន្ទីកម្ពុជានិងក្រុមហ៊ុន Ningbo Weland Renewable Energy Co., Ltd ក្នុងចំណោមក្រុមហ៊ុនដទៃទៀត។
CPSF បាននិយាយនៅក្នុងសេចក្តីប្រកាសព័ត៌មានមួយថា “ភាគីហត្ថលេខីមានបំណងប្រើប្រាស់ធនធាន និងជំនាញរួមរបស់ពួកគេ ដើម្បីលើកកម្ពស់ដំណាំម្រេច ដំឡូងមី និងគ្រាប់ស្វាយចន្ទីកម្ពុជា នៅលើទីផ្សារពិភពលោក” ។កិច្ចព្រមព្រៀងទាំងនេះឆ្លុះបញ្ចាំងពីការប្តេជ្ញាចិត្តរួមគ្នាក្នុងការលើកកម្ពស់វិស័យកសិកម្មរបស់កម្ពុជា និងការរួមចំណែករបស់ខ្លួនទៅកាន់ទីផ្សារអន្តរជាតិ។
កម្ពុជាមានគោលនយោបាយជាតិស្តីពីដំឡូងមីសម្រាប់ឆ្នាំ ២០២០-២០២៥ ដែលត្រូវបានបង្កើតឡើងក្រោមកិច្ចសហប្រតិបត្តិការអន្តរក្រសួង និងការគាំទ្រពីដៃគូអភិវឌ្ឍន៍ និងអនុម័តដោយរដ្ឋាភិបាលកាលពីថ្ងៃទី ១៤ ខែសីហា ឆ្នាំ ២០២០។
យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា កម្ពុជាបាននាំចេញកសិផលចំនួន ៥,៣លានតោនទៅកាន់ទីផ្សារបរទេសក្នុងរយៈពេល៤ខែដំបូងក្នុងឆ្នាំនេះ ដោយទទួលបានប្រាក់ចំណូលចំនួន ២,៣៥ពាន់លានដុល្លារ។
