អ្នកវិនិយោគិនកូរ៉េមួយក្រុមបានមកទស្សនាខេត្តកំពង់ធំ ដើម្បីវាយតម្លៃទីតាំងសក្តានុពលសម្រាប់បង្កើតរោងចក្រកែច្នៃគ្រាប់ស្វាយចន្ទីសម្រាប់ធ្វើការនាំចេញ។ ចំណាប់អារម្មណ៍របស់ពួកគេកើតចេញពីសក្តានុពលកសិកម្មក្នុងតំបន់ និងគោលនយោបាយគាំទ្រការវិនិយោគរបស់រដ្ឋាភិបាលកម្ពុជា។
លោក ស៊ុយ កុកធាន អនុប្រធានសមាគមស្វាយចន្ទីកម្ពុជា (CAC) បានបញ្ជាក់ប្រាប់កាសែតខ្មែរថាមស៍កាលពីថ្ងៃព្រហស្បតិ៍ថា អ្នកវិនិយោគបានចុះពិនិត្យទីតាំងផ្សេងៗទាក់ទងនឹងការដាំដុះស្វាយចន្ទី និងទីតាំងសក្តានុពលសម្រាប់បង្កើតមជ្ឈមណ្ឌលប្រមូលគ្រាប់ស្វាយចន្ទី។ គោលបំណងនៃដំណើរទស្សនកិច្ចនេះគឺដើម្បីស្វែងយល់ពីកិច្ចខិតខំប្រឹងប្រែងក្នុងវិស័យស្វាយចន្ទីដែលអាចដាក់ចេញជាការអនុវត្តន៍បាន។
កាលពីថ្ងៃអង្គារ លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានអនុញ្ញាតឱ្យលោក Lee Kee Yun នាយកក្រុមហ៊ុន Heungkuk Industry និងលោកសាស្ត្រាចារ្យ Lee Changkeun នៃសកលវិទ្យាល័យ Chung-Ang University នៃសាធារណរដ្ឋកូរ៉េ ចូលជួបសម្តែងការគួរសម និងពិភាក្សាការងារ។ ជំនួបនេះ ក៏មានការចូលរួមផងដែរ ពីសំណាក់តំណាងរដ្ឋបាលខេត្តកំពង់ធំ និងសមាគមស្វាយចន្ទីកម្ពុជាផងដែរ នេះបើតាមសេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រី។
លោក Lee បានបន្តជម្រាបជូនថា Heungkuk Industry គឺជាក្រុមហ៊ុនផលិតសម្ភារៈសំណង់សំខាន់មួយនៅសាធារណរដ្ឋកូរ៉េ ដែលមានគោលបំណងធ្វើពិពិធកម្មសកម្មភាពវិនិយោគរបស់ខ្លួន ជាពិសេសលើសកម្មភាពកែច្នៃគ្រាប់ស្វាយចន្ទីនៅប្រទេសកម្ពុជា ដោយមើលឃើញសក្តានុពល និងគោលនយោបាយរបស់រាជរដ្ឋាភិបាលកម្ពុជា។
ក្នុងឱកាសនេះ លោក វង្សី វិស្សុត បានបង្ហាញនូវការគាំទ្រចំពោះគម្រោងវិនិយោគរបស់ក្រុមហ៊ុន Heungkuk Industry លើការកែច្នៃគ្រាប់ស្វាយចន្ទី និងបានបញ្ជាក់នូវឆន្ទៈដ៏មុតមាំ និងគោលនយោបាយរបស់រាជរដ្ឋាភិបាល ក្នុងការគាំទ្រ និងស្វាគមន៍ការវិនិយោគមកពីបរទេស ដើម្បីជំរុញកំណើនសេដ្ឋកិច្ច និងការបង្កើតការងារ ជាពិសេសក្នុងវិស័យកសិកម្ម និងកសិ-ឧស្សាហកម្ម ដែលជាអាទិភាពដ៏សំខាន់មួយរបស់រាជរដ្ឋាភិបាល។
លោកក៏បានគូសរំលេចនូវចក្ខុវិស័យរបស់លោកនាយករដ្ឋមន្រ្តី ហ៊ុន ម៉ាណែត ក្នុងការលើកកម្ពស់ការផលិត និងការកែច្នៃគ្រាប់ស្វាយចន្ទី ក្នុងគោលដៅប្រែក្លាយកម្ពុជាទៅជាប្រទេសដែលនាំចេញគ្រាប់ស្វាយចន្ទីច្រើនជាងគេលើពិភពលោក ឬអធិរាជស្វាយចន្ទី។
លោកបានបន្ថែមថា រាជរដ្ឋាភិបាល ទាំងនៅថ្នាក់ជាតិ និងថ្នាក់ក្រោមជាតិ បានត្រៀមខ្លួនរួចរាល់សម្រាប់ទទួលស្វាគមន៍ដល់គម្រោងវិនិយោគថ្មីៗ ហើយទីស្តីការគណៈរដ្ឋមន្ត្រីផ្ទាល់រីករាយនឹងផ្តល់កិច្ចសហការ ដើម្បីចូលរួមគាំទ្រដល់ការវិនិយោគ និងពង្រឹងចំណងមិត្តភាពរវាងកម្ពុជា និងកូរ៉េ។
ពិភាក្សាអំពីរោងចក្រកែច្នៃគ្រាប់ស្វាយចន្ទី ដែលបានស្នើឡើង លោក ស៊ុយ កុកធាន បានទទួលស្គាល់ថា ការបង្កើតរោងចក្របែបនេះទាមទារឱ្យមានការសិក្សាយ៉ាងទូលំទូលាយ។ ទោះជាយ៉ាងណាក៏ដោយ លោកបានកត់សម្គាល់ពីចំណាប់អារម្មណ៍របស់អ្នកវិនិយោគកូរ៉េចំពោះសក្តានុពលរបស់កម្ពុជា ដែលដាក់ប្រទេសនេះជាទិសដៅវិនិយោគដ៏ទាក់ទាញ។
លោកក៏បានធានាថា សមាគមស្វាយចន្ទីត្រៀមខ្លួនជាស្រេចដើម្បីសម្រួលដល់ការបង្កើតរោងចក្រកែច្នៃគ្រាប់ស្វាយចន្ទី។
“សម្រាប់ខ្ញុំ ដែលធ្វើការដោយផ្ទាល់ក្នុងវិស័យគ្រាប់ស្វាយចន្ទី ខ្ញុំមានសុទិដ្ឋិនិយមខ្លាំង ហើយសង្ឃឹមថានាពេលអនាគតដ៏ខ្លីខាងមុខនេះ អ្នកវិនិយោគមកពីប្រទេសអភិវឌ្ឍកាន់តែច្រើននឹងមកបណ្តាក់ទុនក្នុងឧស្សាហកម្មគ្រាប់ស្វាយចន្ទីរបស់កម្ពុជា។ ជាពិសេស ភាពខ្លាំងរបស់យើងគឺការផលិតរបស់យើងមាននិរន្តរភាព និងរឹងមាំ មានន័យថាគ្មានការខ្វះខាតវត្ថុធាតុដើមសម្រាប់ពួកគេឡើយ” ។
យោងតាមរបាយការណ៍របស់សមាគមស្វាយចន្ទីកម្ពុជា ចាប់ពីខែមករា ដល់ខែតុលា ឆ្នាំ២០២៤ កម្ពុជាផលិតគ្រាប់ស្វាយចន្ទីបាន ៨៤០,០០០តោន កើនឡើង ២៦ភាគរយ បើធៀបនឹងឆ្នាំមុន។
ខេត្តដែលដាំស្វាយចន្ទីច្រើនជាងគេរួមមាន កំពង់ធំ ក្រចេះ ស្ទឹងត្រែង សៀមរាប កំពង់ចាម ឧត្តរមានជ័យ មណ្ឌលគិរី រតនគិរី ព្រះវិហារ ត្បូងឃ្មុំ និងកំពង់ឆ្នាំង។
