កាលពីថ្ងៃពុធ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអំពាវនាវឱ្យមានការគាំទ្រ និងកិច្ចសហប្រតិបត្តិការពីក្រសួង និងស្ថាប័នពាក់ព័ន្ធ ដើម្បីបង្កើនការគ្រប់គ្រងធនធានទឹក ដោយសង្កត់ធ្ងន់ថា តួនាទីរបស់ទឹកគឺមិនមែនសម្រាប់តែប្រព័ន្ធធារាសាស្ត្រកសិកម្ម ប៉ុណ្ណោះទេ។
លោកបានលើកឡើងបែបនេះក្នុងសន្និបាតបូកសរុបលទ្ធផលការងារក្រសួងធនធានទឹក និងឧតុនិយម គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប ប្រចាំឆ្នាំ២០២៤ និងទិសដៅអនុវត្តឆ្នាំ២០២៥នៅសណ្ឋាគារសុខាភ្នំពេញ នៅថ្ងៃទី១២ ខែកុម្ភៈ។
ក្នុងសុន្ទរកថាបើក លោកបានមានប្រសាសន៍ថា ក្រោមការដឹកនាំដ៏ឈ្លាសវៃរបស់លោកនាយករដ្ឋមន្ត្រី ហ៊ុន ម៉ាណែត រាជរដ្ឋាភិបាលនៅតែប្តេជ្ញាយកចិត្តទុកដាក់ខ្ពស់លើវិស័យធនធានទឹក និងឧតុនិយម។
“ការប្តេជ្ញាចិត្តរបស់រដ្ឋាភិបាលមាននៅក្នុងយុទ្ធសាស្ត្របញ្ចកោណដំណាក់កាលទី១ ដែលផ្តល់អាទិភាពដល់វិស័យសំខាន់ៗចំនួន៥ ដូចជាមនុស្ស ផ្លូវ ទឹក ភ្លើង និង បច្ចេកវិទ្យាដើម្បីកំណើន ការងារ សមធម៌ ប្រសិទ្ធភាព និង ចីរភាព។
លោកបានបន្ថែមថា អាទិភាពទាំងនេះជាមូលដ្ឋានគ្រឹះឆ្ពោះទៅសម្រេចចក្ខុវិស័យជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
លោក ថោ ជេដ្ឋា ដែលមានតួនាទីជាប្រធានគណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាបបានសង្កត់ធ្ងន់ថា វិស័យធនធានទឹក ពុំមែនជាវិស័យមួយ ដែលបម្រើឱ្យតែការស្រោចស្រពដំណាំកសិកម្មតែមួយមុខប៉ុណ្ណោះទេ ក៏ប៉ុន្តែវិស័យធនធានទឹក បាននិងកំពុងបម្រើឱ្យពហុវិស័យដូចជា កិច្ចគាំពារបរិស្ថាន ឧស្សាហកម្ម ថាមពល ការដឹកជញ្ជូន ទេសចរណ៍ អភិវឌ្ឍន៍ជនបទ អាកាសចរណ៍ និងការគ្រប់គ្រងគ្រោះមហន្តរាយ ហើយដែលទាមទារឱ្យមានកិច្ចសហការគាំទ្រពីក្រសួង-ស្ថាប័នពាក់ព័ន្ធ។
លោកបានបន្ថែមថា នៅក្នុងផែនការយុទ្ធសាស្ត្រអភិវឌ្ឍន៍វិស័យធនធានទឹក និងឧតុនិយម និងផែនការយុទ្ធសាស្រ្តអភិវឌ្ឍន៍រយៈពេល៥ឆ្នាំ(២០២៤-២០២៨) របស់ក្រសួង-ស្ថាប័នទាំងបី បានដាក់ចេញយ៉ាងច្បាស់នូវសកម្មភាពជាអាទិភាព សូចនាករ និងពេលវេលាច្បាស់លាស់សម្រាប់ការអនុវត្តសកម្មភាព។
ផែនការនេះក៏បង្កើតយន្តការត្រួតពិនិត្យវាយតម្លៃដោយផ្អែកលើក្របខ័ណ្ឌសមិទ្ធកម្មគន្លឹះ ហើយក៏បានកំណត់អំពីការទទួលខុសត្រូវរបស់នាយកដ្ឋានជំនាញនីមួយៗ។
លោកបានបន្ថែមថាវិធីសាស្រ្តនេះគឺដើម្បីធានាភាពជោគជ័យក្នុងការអភិវឌ្ឍ ការគ្រប់គ្រង និងការអភិរក្សធនធានទឹកប្រកបដោយប្រសិទ្ធភាព ស័ក្កិសិទ្ធិភាព និងនិរន្តរភាព។
គួររំលឹកផងដែរថា កាលពីថ្ងៃទី៤ ខែកុម្ភៈ លោកបានជំរុញឱ្យសមាជិកគណៈកម្មាធិការជាតិទន្លេមេគង្គកម្ពុជានិងអ្នកពាក់ព័ន្ធផ្តល់អាទិភាពដល់ការពង្រឹងការគ្រប់គ្រងធនធានទឹកក្នុងកិច្ចប្រជុំបូកសរុបលទ្ធផលឆ្នាំ២០២៤ និងលើកទិសដៅអនុវត្តយុទ្ធសាស្ត្រឆ្នាំ២០២៥។
លោកបានសង្កត់ធ្ងន់ថា រាជរដ្ឋាភិបាលទទួលស្គាល់សារសំខាន់ជាយុទ្ធសាស្ត្រនៃការគ្រប់គ្រងធនធានទឹក និងប្តេជ្ញាធ្វើឱ្យប្រសើរឡើង ដើម្បីធានាការផ្គត់ផ្គង់ទឹកដែលអាចទុកចិត្តបាន និងមាននិរន្តរភាពសម្រាប់ប្រទេសជាតិ។
លោកបានបន្ថែមថា “នេះអាចសម្រេចបានតាមរយៈការបន្តកិច្ចសហប្រតិបត្តិការជាមួយអ្នកពាក់ព័ន្ធក្នុងតំបន់ និងពិភពលោក ក៏ដូចជាការលើកកម្ពស់ការគ្រប់គ្រងអាងទន្លេឆ្លងប្រទេស”។
