ដើម្បីកែលម្អសេវាថែទាំសុខភាពក្នុងខេត្តសៀមរាប អាជ្ញាធរនៅថ្ងៃព្រហស្បតិ៍នេះ បានបើកការដ្ឋានសាងសង់មជ្ឈមណ្ឌលព្យាបាលជំងឺបេះដូង ដែលមានតម្លៃជាង ២លានដុល្លារ នៅមន្ទីរពេទ្យបង្អែកខេត្តសៀមរាប។
ប្រធានមន្ទីរពេទ្យបង្អែកខេត្តសៀមរាប លោក ប៉ែន ផលគុណ មានប្រសាសន៍ថា មជ្ឈមណ្ឌលថ្មីនេះ ត្រូវបានគាំទ្រដោយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ។
លោកបានបន្ថែមថា អគារថ្មីនេះនឹងក្លាយជាផ្នែកនៃមន្ទីរពេទ្យបង្អែក ដែលមានសមត្ថភាពអភិវឌ្ឍន៍ខ្ពស់ជាងមន្ទីរពេទ្យខេត្តផ្សេងទៀតក្នុងតំបន់ ដែលនាំឱ្យប្រជាពលរដ្ឋរស់នៅក្នុងខេត្តក្បែរនោះមកប្រើប្រាស់សេវារបស់ខ្លួនយ៉ាងច្រើន ជាពិសេសនៅពេលដែលពួកគេមានបញ្ហាសុខភាពធ្ងន់ធ្ងរ ឬស្មុគស្មាញ។
លោកបានបន្តថា តាមការវិភាគ ជំងឺសរសៃឈាមបេះដូង និងជំងឺខ្សោយបេះដូង គឺស្ថិតក្នុងចំណោមមូលហេតុកំពូលទាំង ១០ ដែលនាំឲ្យស្លាប់នៅមន្ទីរពេទ្យ។
លោក ឌី រ៉ាដូ អភិបាលរងខេត្តសៀមរាប ក៏បានមានប្រសាសន៍ថា មជ្ឈមណ្ឌលជំងឺបេះដូងនឹងជាសមិទ្ធិផលថ្មីក្នុងវិស័យសុខាភិបាលខេត្ត ហើយនឹងជួយសម្រួលដល់ការផ្តល់សេវាសុខភាពជូនប្រជាពលរដ្ឋយើងកាន់តែមានភាពងាយស្រួល និងមានប្រសិទ្ធភាព។
លោកថា ការសាងសង់អគារនេះក៏ជាសមិទ្ធផលដ៏ធំមួយរបស់រដ្ឋាភិបាល និងរដ្ឋបាលខេត្ត ដោយធ្វើឱ្យវិស័យសុខាភិបាលខេត្តកាន់តែទំនើប ។
